Déclaration des Nations Unies sur les droits des peuples autochtones (en oji-cri)

---

Version PDF

ᓇᑭᓂᑲᐣ
ᑲᒪᒪᐏᓂᑲᑌᑭᐣ ᐸᐸᑲᐣ ᐊᐦᑭᐣ ᐅᑯᒪᐏᓇᐣ ᑭᒋ ᐃᑭᑐᐏᐣ ᐃᑵᓂᐘᐣ ᐅᒋ ᐊᓂᔑᓂᓂᐘᐣ

ᓂᐡᑕᒼ ᑲᑭ ᐅᔑᐱᐦᐃᑲᑌᑭᐸᐣ
ᑲᒪᒪᐏᓂᑲᑌᑭᐣ ᐸᐸᑲᐣ ᐊᐦᑭᐣ ᐅᑯᒪᐏᓇᐣ
ᐅᑯᒪᐏᓇᐠ ᐃᒪ ᑲᐏᒋ ᔓᓂᔭᑫᒪᑲᐠ ᐊᓄᐦᑭᐏᐱᒧᒋᑫᐏᓂᐠ ᐁᑿ ᐘᐏᒋᐏᑐᐏᓂᐠ ᐱᒧᒋᑫᐏᓇᐣ
ᐘᑌᐸᑲᐏᐱᓱᒼ 2007

ᐅᓀᐣᒋᑫᐏᐣ ᑲᑭ ᐅᑕᐱᓂᑲᑌᐃ ᐃᒪ ᒪᒪᐅ ᒪᐘᒋᐦᐃᑐᐏᓂᐠ ᒣᑿᐨ ᐘᑌᐸᑲᐏᐱᓱᒼ 2007

[ᑲᐏᐣ ᐃᐍ ᒪᔭᒼ ᐊᐱᑕᒪᑫᐏᓂᐠ (A/61/L.67 ᐁᑿ ᐊᔑᑎᓇᐣ.1)]

61/295. ᑲᒪᒪᐏᓂᑲᑌᑭᐣ ᐸᐸᑲᐣ ᐊᐦᑭᐣ ᐅᑯᒪᐏᓇᐣ ᑭᒋ ᐃᑭᑐᐏᐣ

ᒪᒪᐅ ᒪᐘᒋᐦᐃᑐᐏᓂᐠ,

ᒋᑭᑫᐣᒋᑲᑌᐠ ᑲᑭᔑᐏᑕᒪᑫᐘᐨ ᐊᐏᔭᐠ ᐅᒥᓂᑯᓱᐏᓂᐘᐣ ᐅᓇᔑᐍᐏᓂᐠ ᐅᑕᐱᑕᒪᑫᐏᓂᐠ ᑭᐊᔭᓂ ᐃᐍᓂ ᐅᓀᐣᑕᒪᑫᐏᓂᓂ 1/2 of 29 ᓴᑭᐸᑲᐏᐱᓱᒼ 2006,^{Note de bas de page 1} ᐃᐍᓂ ᐅᑕᐱᑕᒪᑫᐠ ᑲᑭ ᐅᑕᐱᓇᒧᐘᐨ ᒪᓯᓇᐦᐃᑫᐏᓇᐣ ᐃᒪ ᑲᒪᒪᐏᓂᑲᑌᑭᐣ ᐸᐸᑲᐣ ᐊᐦᑭᐣ ᐅᑯᒪᐏᓇᐣ ᑭᒋ ᐃᑭᑐᐏᐣ ᐃᐍᓂ ᐅᒋ ᐅᒥᓂᑯᓱᐏᓇᓂᐘᐣ ᐊᓂᔑᓂᓂᐘᐠ᙮

ᑭᐍ ᑲᓇᐘᐸᒋᑲᑌᐠ ᐅᓀᐣᒋᑫᐏᐣ 61/178 ᒣᑿᐨ 20 ᒪᑯᔐᑭᔑᑲᓂᐱᓱᒼ 2006, ᐁᑭ ᐅᓀᐣᒋᑲᑌᑭᐸᐣ ᐱᓇᒪ ᐁᑲ ᒋᐏᓀᐣᒋᑲᑌᐠ ᐁᑿ ᓇᐣᑕ ᒋᑐᒋᑲᑌᐠ ᐃᐍ ᑭᒋ ᐃᑭᑐᐏᐣ ᒋᑕᔑ ᐱᒥ ᑕᔑᒋᑲᑌᐠ ᐃᐍ, ᐁᑿ ᑲᔦ ᑭᐏᓀᐣᒋᑲᑌᐸᐣ ᒋᑭᔑ ᐅᓀᐣᒋᑲᑌᐠ ᐃᐍ ᒷᔦ ᐃᐡᑿᓭᐠ ᓂᑯᑢᓱᒥᑕᓇ ᐯᔑᑯᔕᑅ ᑕᐦᔁ ᐱᒥᓭᐠ ᒪᒪᐅ ᒪᐘᒋᐦᐃᑐᐏᓂᐠ,

ᑭᐏᑕᐱᓂᑲᑌ ᑲᒪᒪᐏᓂᑲᑌᑭᐣ ᐸᐸᑲᐣ ᐊᐦᑭᐣ ᐅᑯᒪᐏᓇᐣ ᑭᒋ ᐃᑭᑐᐏᐣ ᐃᐍᓂ ᐅᒋ ᐊᓂᔑᓂᓂᐘᐠ ᐅᒥᓂᑯᓱᐏᓂᐘᐣ ᑲᐃᔑ ᐊᔑᑕᓯᓇᐦᐃᑲᑌᓂᐠ ᐊᓂᑯᓂᑫᐏᓂᓂᐠ ᐃᒪ ᓄᑯᒼ ᑲᔭᐠ ᐅᓀᐣᒋᑫᐏᓂᐠ᙮

107th ᑭᐡᒋᑫᐏᐣ ᒪᐘᒋᐦᐃᑐᐏᐣ
13 ᐘᑌᐸᑲᐏᐱᓱᒼ 2007

ᓇᑭᓂᑲᐣ
ᑲᒪᒪᐏᓂᑲᑌᑭᐣ ᐸᐸᑲᐣ ᐊᐦᑭᐣ ᐅᑯᒪᐏᓇᐣ ᑭᒋ ᐃᑭᑐᐏᐣ ᐃᐍ ᐅᒋ ᐊᓂᔑᓂᓂᐘᐠ

ᒪᒪᐅ ᒪᐘᒋᐦᐃᑐᐏᓂᐠ,

ᑲᐏᒋ ᑭᑭᓄᓂᐍᒪᑲᐠ ᐃᐍ ᑲᐏᒋ ᑐᒋᑲᑌᐠ ᐁᑿ ᑲᐏᒋ ᐏᒋᑲᐸᐏᑕᒪᑫᒪᑲᐠ ᐃᐍ ᐅᔑᐱᐦᐃᑫᐏᓂᐠ ᐃᒪ ᑲᒪᒪᐏᓂᑲᑌᑭᐣ ᐸᐸᑲᐣ ᐊᐦᑭᐣ ᐅᑯᒪᐏᓇᐣ, ᐁᑿ ᑲᐃᔑ ᑌᐻᔦᐣᒋᑲᑌᐠ ᒋᑭᐡᒋᑲᑌᑭᐣ ᐱᒧᒋᑫᐏᓇᐣ ᑲᑭᔑ ᐅᑕᐱᓇᒧᐘᒋᐣ ᐃᒪ ᐸᐱᐠᓯᔭᐦᑭᐠ ᑲᐃᔑᐘᐍᓇᐦᑌᑭᐣ ᐃᒪ ᐅᔑᐱᐦᐃᑫᐏᓂᐠ,

ᒋᑫᒋᓇᒋᑲᑌᐠ ᐃᑵᓂᐘᐠ ᐊᓂᔑᓂᓂᐘᐠ ᐁᑕᐱᑕᐍᐣᑕᑯᓯᐘᐨ ᑲᑭᓇ ᐊᐏᔭᐣ ᑲᐃᔑ ᐃᓀᐣᑕᑯᓯᓂᐨ ᑫᐏᓇᐘ, ᒣᑿᐨ ᑲᔦ ᐁᓂᐦᓯᑕᐏᓂᑲᑌᐠ ᑲᐃᔑᒥᓂᑯᓯᐘᐨ ᐊᐏᔭᐠ ᐁᐸᐸᑲᓂᓇᑿᓂᓂᑭᐣ, ᒋᐸᑲᐣ ᐃᓀᓂᒥᑎᓯᐘᐨ, ᐁᑿ ᒋᑲᓇᑌᓂᒪᑲᓄᐘᐨ ᐃᐍᓂ ᐅᒋ,

ᒋᑫᒋᓇᒋᑲᑌᐠ ᑲᔦ ᑲᑭᓇ ᐊᐏᔭᐠ ᐅᒋᐏᒋᐦᐃᐍᓭᓂ ᑲᐏᒋ ᐸᐸᑲᓀᐣᑕᑯᓯᓇᓂᐘᐠ ᐁᑿ ᑲᐃᔑ ᐍᓄᑌᐣᑕᑿᐠ ᐃᐅᑵᓂᐘᐣ ᐊᐏᔭᐠ ᐅᐱᒪᑎᓱᐏᓂᐘᐣ ᐁᑿ ᐃᔑ ᐱᒪᑎᓱᐏᓇᐣ, ᑲᐏᒋᓭᐠ ᐃᐍ ᒪᒪᐅ ᐃᔑᐱᒪᑎᓱᐏᓂᐠ ᐊᐏᔭᐠ ᑲᐏᒋᑎᐯᐣᑕᑯᓯᐘᐨ,

ᐊᐘᔑᒣ ᒋᑫᒋᓇᒋᑲᑌᐠ ᑲᑭᓇ ᐊᔭᒥᐦᐊᐏᐱᒧᒋᑫᐏᓇᐣ, ᐅᔑᐱᐦᐃᑫᐏᓇᐣ ᑫᑐᒋᑲᑌᑭᐣ ᑫᑯᓇᐣ ᐁᑿ ᑫᐃᔑᐱᒧᒋᑲᓂᐘᐠ ᐃᒪ ᑲᐅᒋᓭᐠ ᓇᐣᑕ ᑲᐃᔑ ᔕᔑᑭᒥᐍᓇᓂᐘᐠ ᑲᐡᑲᐏᓯᐘᐨ ᐊᐏᔭᐠ ᓇᐣᑕ ᑲᐃᔑ ᐸᐯᔑᑯᐘᒋᐣ ᐊᐏᔭᐠ ᐃᒪ ᒥᓯᐍ ᐊᐦᑭᐠ ᑲᐏᒋᐘᐨ ᓇᐣᑕ ᐊᐏᔭᐠ ᑲᐏᒋᑎᐯᐣᑕᑯᓯᐘᐨ ᐅᑕᓂᔑᓂᓂᐏᓂᐠ ᑲᐏᒋᐨ, ᐅᑕᔭᒥᐦᐊᐏᓂᐠ, ᑲᐏᑕᑎᓯᐨ ᓇᐣᑕ ᑲᐃᔑᐱᒪᑎᓯᐨ ᑲᐃᔑ ᒪᒪᔭᑭᓇᑿᓂᓂᐠ ᐅᒋ ᐃᐍ ᒪᒉᐣᒋᑫᐏᐣ, ᑲᐃᔑᓇᓇᑲᑕᐘᐸᒋᑲᑌᑭᐣ ᑫᑯᓇᐣ ᑲᐏᐣ ᐃᑵᓂᐘᐣ ᑌᐻ, ᐅᓇᑯᓂᑫᐏᓂᐠ ᑲᐏᐣ ᒋᔭᓄᐦᑭᓭᑭᐣ ᐃᒪ, ᐁᑲ ᑲᐸᑲᒥᐡᑲᑯᐨ ᐊᐏᔭ ᐅᑐᑕᒧᐏᓇᐣ ᐁᑿ ᐘᐏᒋᐏᑐᐏᓂᐠ ᑲᐃᔑᒪᒋᓭᐠ,

ᒋᑭᐍᑫᒋᓇᒋᑲᑌᐠ ᐃᑵᓂᐘᐠ ᐊᓂᔑᓂᓂᐘᐠ,ᑲᔭᐸᒋᑐᐘᐠ ᐅᒥᓂᑯᓱᐏᓂᐘᐣ, ᑕᑭᐸᐣᐢᑵᓯᐘᐠ ᐃᐍᓂ ᐅᒋ ᐊᓂᑯ ᑲᐃᔑᓇᑿᓂᓂᑭᐣ ᒪᒋᓀᓂᒥᑯᐏᓂᐠ,

ᒥᑯᐡᑲᑌᐣᑕᒧᐏᐣ ᐊᓂᔑᓂᓂᐘᐠ ᐁᑭᑲᑿᑕᑭᐦᐊᑲᓄᐘᐨ ᐃᒪ ᐅᒋ ᐅᑕᓇᐠ ᐅᓇᑯᓂᑫᐏᓂᐠ ᒪᓂᑐᑕᑯᐏᓂᐠ ᐊᒥ ᑕᐡ, ᑯᑕᑭᔭᐣ ᑲᔦ ᑫᑯᓇᐣ, ᐸᑲᐣ ᑲᑭᐏᒋ ᐅᑯᒪᐏᐣᑕᐘᑲᓄᐘᐨ ᐁᑿ ᑲᑭᐏᑕᐱᓂᑲᑌᓂᑭᐣ ᐅᑕᐦᑭᒥᐘᐣ, ᐅᑕᔑᑫᐏᓂᐘᐣ ᐁᑿ ᐅᑕᐸᒋᒋᑲᓂᐘᐣ, ᐊᒥᐍᓂ ᑲᑭᐏᒋ ᑭᐱᑎᓂᑯᐘᐨ ᒋᔭᐸᒋᑐᐘᐨ, ᐃᐍᓂ ᒪᔭᒼ, ᐅᒥᓂᑯᓱᐏᓂᐘᐣ ᑫᑭᐏᒋ ᐘᐍᓇᐦᑐᐘᒋᐣ ᑲᐃᔑᓇᐦᐃᓇᑿᓂᓂᑭᐣ ᐅᓇᑕᐍᐣᑕᒪᐏᓂᐘᐣ ᐁᑿ ᐅᑭᒋᓀᐣᑕᒧᐏᓂᐘᐣ,

ᒋᓂᐦᐢᑕᐏᓂᑲᑌᐠ ᑲᑭᒋ ᓇᑕᐍᐣᑕᑿᐠ ᒋᑲᓇᑌᐣᒋᑲᑌᐠ ᐁᑿ ᒋᐱᒥᓇᑯᒋᑲᑌᐠ ᒪᐣᑐᓇᐠ ᐅᒥᓂᑯᓱᐏᓂᐘᐣ ᐊᓂᔑᓂᓂᐘᐠ ᐃᒪ ᑲᐏᒋᓭᓂᐠ ᐅᑐᑯᒪᐏᓂᐘᐠ, ᑲᔓᓂᔭᑫᒪᑲᐠ ᐊᓄᐦᑭᐏᐱᒧᒋᑫᐏᓂᐠ ᐁᑿ ᐘᐏᒋᐏᑐᐏᓂᐠ ᐘᐍᓇᐦᒋᑫᐏᓇᐣ ᐁᑿ ᐃᒪ ᐅᑎᔑᐱᒪᑎᓱᐏᓂᐘᐠ, ᑲᔭᐡ ᐅᑕᐦᒐᑯ ᑐᑕᒧᐏᓂᐘᐣ, ᐅᑕᓇᐠ ᑲᐱᑕᑐᑕᒧᐘᐨ ᐁᑿ ᑲᐃᔑ ᐘᐸᑕᒧᐘᒋᐣ ᑫᑯᓇᐣ, ᐃᑵᓂᐘᐣ ᒪᐘᐨ ᐅᒥᓂᑯᓱᐏᓂᐘᐣ ᐃᒪ ᐅᑕᐦᑭᒧᐘᐠ, ᐅᑕᔑᑫᐏᓂᐘᐠ ᐁᑿ ᐅᑕᐸᒋᒋᑲᓂᐘᐣ,

ᒋᓂᐦᐢᑕᐏᓂᑲᑌᐠ ᑲᔦ ᑲᑭᒋ ᓇᑕᐍᐣᑕᑿᐠ ᒋᑲᓇᑌᐣᒋᑲᑌᐠ ᐁᑿ ᒋᐱᒥᓇᑯᒋᑲᑌᐠ ᒪᐣᑐᓇᐠ ᐅᒥᓂᑯᓱᐏᓂᐘᐣ ᐊᓂᔑᓂᓂᐘᐠ ᒋᑫᒋᓇᒋᑲᑌᐠ ᐃᒪ ᐅᑯᒪᐏᓇᐣ ᓇᐦᑯᑕᒪᐏᓇᐣ, ᑌᐻᑕᑐᐏᓇᐣ ᐁᑿ ᑯᑕᑭᔭᐣ ᑲᒪᐡᑲᐏᐘᐍᓇᐦᑕᒪᑎᓇᓂᐘᐠ ᐃᒪ ᐸᐱᐠᓯᔭᐦᑭᐠ ᐅᑯᒪᐏᓇᐣ,

ᐅᑕᐱᓂᑲᑌᐠ ᑌᐻᐏᓇᐠ ᐊᓂᔑᓂᓂᐘᐠ ᐁᐘᐍᓇᓯᑎᓯᐘᐨ ᐃᒪ ᐅᑐᑯᒪᐏᓂᐘᐠ, ᑲᔓᓂᔭᑫᒪᑲᐠ ᐊᓄᐦᑭᐏᐱᒧᒋᑫᐏᓂᐠ ᐘᐏᒋᐏᑐᐏᓂᐠ ᐁᑿ ᑲᐃᔑᐱᒪᑎᓯᐘᐨ ᓇᓇᑭᓂᑫᐏᓇᐣ ᐁᑿ ᑫᐏᒋ ᑭᐱᑎᓂᑲᑌᑭᐣ ᑲᑭᓇ ᑲᐃᔑᓇᑿᑭᐣ ᒪᒉᓂᒧᐍᐏᓇᐣ ᐁᑿ ᑲᑿᑕᑭᐦᐃᐍᐏᓇᐣ ᐊᐣᑎ ᐱᑯ ᑲᑕᔑ ᐃᓯᓭᑭᐣ,

ᑌᐻᒋᑲᑌ ᐏᓇᐘ ᐱᒧᑐᐘᐨ ᐊᓂᔑᓂᓂᐘᐠ ᑲᐘᐍᓇᐦᒋᑲᓂᐘᓂᓂᐠ ᑲᐸᑲᒥᐡᑲᑯᐘᒋᐣ ᐏᓇᐘ ᐁᑿ ᑲᔦ ᐅᑕᐦᑭᒥᐘᐣ, ᐅᑕᔑᑫᐏᓂᐘᐣ ᐁᑿ ᐅᑕᐸᒋᒋᑲᓂᐘᐣ ᐅᑲᐏᒋ ᐏᒋᐦᐃᑯᓇᐘ ᒋᐱᒥᐸᒥᐦᑐᐘᐨ ᐁᑿ ᒋᒪᐡᑲᐏᑐᐘᐨ ᐅᐱᒧᒋᑫᐏᑲᒥᑯᐘᐣ, ᐅᑎᔑᐱᒪᑎᓱᐏᓂᐘᐣ ᐁᑿ ᑲᔭᐡ ᐅᑐᑕᒧᓂᐘᐣ, ᐁᑿ ᒋᐱᒥᓇᑯᑐᐘᐨ ᐅᐘᐍᓇᐦᒋᑫᐏᓂᐘᐣ ᑲᐃᔑᓇᐦᐊᐏᓭᓂᐠ ᐃᒪ ᑲᐃᔑᐸᑯᓭᐣᑕᒧᐘᐨ ᐁᑿ ᐅᓇᑕᐍᐣᑕᒧᐏᓂᐘᐣ,

ᒋᓂᐦᐢᑕᐏᓂᑲᑌᐠ ᑲᑲᓇᑌᐣᒋᑲᑌᑭᐣ ᐊᓂᔑᓂᓂᐏ ᑭᑫᐣᑕᒪᐏᐣ, ᐅᑎᔑᐱᒪᑎᓱᐏᓂᐘᐣ ᐁᑿ ᑲᔭᐡ ᐅᑐᑕᒧᐏᓂᐘᐣ ᐃᔑᐏᒋᐦᐃᐍᓭ ᑫᐏᒋ ᐱᒪᑕᐠ ᐁᑿ ᑫᐏᒋ ᑕᐱᑕᐏᓭᑭᐣ ᐘᐍᓇᐦᒋᑫᐏᓇᐣ ᐁᑿ ᑿᔭᐠ ᐱᒧᒋᑫᐏᐣ ᐃᐍ ᐅᒋ ᐱᑿᒋᔭᐦᐃᐠ,

ᒋᑭᒋᐘᐏᒋᑲᑌᑭᐣ ᑲᑭᔑᐏᒋᐦᐃᐍᓭᐠ ᑲᑭᑭᐱᒋ ᔑᒪᑲᓂᔑᑲᒋᑲᑌᑭᐣ ᐊᓂᔑᓂᓂᐏ ᐊᐦᑭᐣ ᐁᑿ ᑕᔑᑫᐏᓇᐣ ᑫᐏᒋ ᐸᔭᑕᑫᐣᑕᑿᐠ, ᑲᔓᓂᔭᑫᒪᑲᐠ ᐊᓄᐦᑭᐏᐱᒧᒋᑫᐏᓂᐠ ᐁᑿ ᐘᐏᒋᐏᑐᐏᓂᐠ ᑲᐃᔑᐱᒥᓭᐠ ᐁᑿ ᐘᐍᓇᐦᒋᑫᐏᓂᐠ, ᑭᑫᐣᑕᒪᐏᐣ ᐁᑿ ᐅᑐᑌᒥᑐᐏᓂᐠ ᐃᔑᐘᐏᒋᐏᑐᐣ ᐃᑵᓂᐘᐣ ᐅᑯᒪᐏᓇᐣ ᐁᑿ ᐊᐏᔭᐠ ᒥᓯᐍ ᐱᑯ ᐊᐦᑭᐠ ᑲᔭᐘᐨ,

ᒋᓂᐦᐢᑕᐏᓂᑲᑌᐠ ᐃᐍ ᒪᔭᒼ ᐅᒥᓂᑯᓱᐏᓂᐘ ᐊᓂᔑᓂᓂᐏ ᑎᐯᐣᒋᑫᐏᓇᐣ ᐁᑿ ᑕᔑᑫᐏᓇᐣ ᒋᐱᒥᑐᒋᑲᑌᐠ ᐃᐍ ᑲᐏᒋᐦᐃᑎᓇᓂᐘᐠ ᑲᐅᐱᑭᐦᐊᐘᓯᓇᓂᐘᐠ, ᑲᑲᑵᒋᐦᐊᑲᓄᐘᐨ, ᑲᑭᑭᓄᐦᐊᒷᑲᓄᐘᐨ ᐁᑿ ᑫᐏᒋ ᒥᓄᓭᓂᐨ ᐅᑕᐘᔑᔑᒥᐘᐣ, ᑫᐏᒋᓇᐱᓭᓂᐠ ᐃᐍᓂ ᐊᐘᔑᔕᐠ ᐅᒥᓂᑯᓱᐏᓂᐘᐣ,

ᒪᒥᑐᓀᐣᒋᑲᑌᐠ ᐃᐍᓂ ᐅᒥᓂᑯᓱᐏᓂᐘᐣ ᒋᑫᒋᓇᒋᑲᑌᓂᐠ ᐃᒪ ᐅᑯᒪᐏᓇᐣ ᓇᑯᑕᒪᑫᐏᓂᐠ, ᑌᐻᑕᒪᑐᐏᓇᐣ ᐁᑿ ᑯᑕᑭᔭᐣ ᑲᒪᐡᑲᐏᐘᐍᓇᐦᑕᒪᑎᓇᓂᐘᐠ ᐃᒪ ᐸᐱᐠᓯᔭᐦᑭᐠ ᐅᑯᒪᐏᓇᐣ ᐁᑿ ᐊᓂᔑᓂᓂᐘᐠ ᐃᓯᓭᐘᐣ, ᐁᐡᑲᒼ ᑲᐃᓯᓭᐠ ᐊᐦᑯ, ᒥᓯᐍ ᐱᑯ ᐊᐦᑭᐠ ᐅᒋᒥᑯᐡᑲᒋᒋᑫᒪᑲᐣ, ᒋᑫᐣᑕᒥᐦᐃᐍᐏᐣ, ᑲᓇᐘᐸᒥᑯᓱᐏᐣ ᐁᑿ ᐁᑭᐦᒋᓇᑿᐠ,

ᒪᒥᑐᓀᐣᒋᑲᑌᐠ ᐃᒪ ᐅᑯᒪᐏᓇᐣ ᓇᐦᑯᑕᒪᐏᓇᐣ, ᑌᐻᑕᑐᐏᓇᐣ ᐁᑿ ᑯᑕᑭᔭᐣ ᑲᒪᐡᑲᐏᐘᐍᓇᐦᑕᒪᑎᓇᓂᐘᐠ, ᐁᑿ ᐘᐏᒋᐏᑐᐏᓂᐠ ᑲᐃᔑᓇᐱᐡᑲᑫᐘᐨ, ᐅᒋᓭᓂ ᐃᐍᓂ ᑲᒪᐡᑲᐏᒪᑲᓂᓂᐠ ᐏᒋᐏᑐᐏᓂᐠ ᐃᑵᓂᐘᐠ ᐊᓂᔑᓂᓂᐘᐠ ᐁᑿ ᐸᐸᑲᐣ ᐱᐠᓯᔭᐦᑭᐣ ᐅᑯᒪᐏᓇᐣ,

ᑭᑫᐣᒋᑲᑌᐠ ᐃᐍ ᐅᔑᐱᐦᐃᑫᐏᐣ ᐃᒪ ᑲᒪᒪᐏᓂᑲᑌᑭᐣ ᐸᐸᑲᐣ ᐊᐦᑭᐣ ᐅᑯᒪᐏᓇᐣ, ᒥᓯᐍ ᐱᑯ ᐊᐦᑭᐠ ᓇᑯᑕᒪᑫᐏᓇᐣ ᐃᑵᓂᐘᐣ ᐅᒋ ᑲᔓᓂᔭᑫᒪᑲᑭᐣ ᐊᓄᐦᑭᐏᐱᒧᒋᑫᐏᓇᐣ, ᐘᐏᒋᐏᑐᐏᓂᐠ ᐁᑿ ᑲᐃᔑᐱᒪᑎᓯᓇᓂᐘᐠ ᒥᓂᑯᓱᐏᓇᐣ^{Note de bas de page 2} ᐁᑿ ᒥᓯᐍ ᐱᑯ ᐊᐦᑭᐠ ᓇᑯᑕᒪᑫᐏᓇᐣ ᐃᑵᓂᐘᐣ ᐅᒋ ᐸᐣᐢᑵᓱᐏᓇᐣ ᒥᐃᑯᓱᐏᓇᐣ2, ᐃᑵᓂᐘᐣ ᑲᔦ ᐱᐁᓇ ᑭᒋ ᐃᑭᑐᐏᐣ ᐁᑿ ᑲᐃᔑᐘᐍᓇᐦᒋᑲᓂᐘᐠ ᑫᑐᒋᑲᑌᐠ^{Note de bas de page 3}, ᑲᐃᔑᑭᒋᓀᐣᑕᒧᐘᐨ ᑫᐏᒋ ᐸᐣᐢᑵ ᐅᓀᐣᑕᒧᐘᐨ ᑫᐃᓯᓭᓂᐠ ᐅᑐᑯᒪᐏᓂᐘᐣ ᑲᐃᓇᐦᑌᓂᐠ ᐁᑿ ᒋᐸᐣᐢᑵᓭᐘᐨ ᒋᐱᒥᐣᔕᐦᐊᒧᐘᐨ ᑲᔓᓂᔭᑫᓭᓂᐠ ᐅᑕᓄᐦᑭᐏᐱᒧᒋᑫᐏᓂᐘᐣ, ᐅᐘᐏᒋᐏᑐᐏᓂᐘᐣ ᐁᑿ ᑲᐃᔑᐱᒪᑎᓯᐘᐨ ᐅᐘᐍᓇᐦᒋᑫᐏᓂᐘᐣ,

ᒋᐱᒥᒪᒥᑎᓀᐣᒋᑲᑌᐠ ᑲᐏᐣ ᑫᑯᐣ ᐅᒪ ᑭᒋ ᐃᑭᑐᐏᓂᐠ ᑕᑭ ᐊᐸᑕᓯᓄᐣ ᑫᐏᒋ ᑭᐱᑎᓇᑲᓄᐘᐨ ᐊᓂᑯ ᐊᐏᔭᐠ ᐅᒥᓂᑯᓱᐏᓂᐘᐣ ᒋᐯᔑᑯᑌᐱᓇᒪᓯᐘᐨ, ᒋᔭᐸᑕᐠ ᑲᐃᔑᐏᓇᐦᑌᐠ ᐃᒪ ᒥᓯᐍ ᐊᐦᑭᐠ ᐅᓇᑯᓂᑫᐏᓂᐠ,

ᑌᐻᑕᒧᐏᐣ ᐃᐍ ᑲᓂᐦᐢᑕᐏᓂᑲᑌᑭᐣ ᐅᒥᓂᑯᓱᐏᓂᐘᐣ ᐊᓂᔑᓂᓂᐘᐠ ᐅᒪ ᑭᒋ ᐃᑭᑐᐏᐣ ᑕᐏᒋ ᓇᑭᓭ ᒥᓄᐏᒋᐏᑐᐏᐣ ᐁᑿ ᐏᒋᐦᐃᑐᐏᓂᐠ ᑲᐃᔑ ᐏᒋᐏᑎᓇᓂᐘᐠ ᐃᑵᓂᐘᐠ ᐃᒪ ᐸᐸᑲᐣ ᐱᐠᐢᔭᐦᑭᐠ ᐅᑯᒪᐏᓇᐣ ᐁᑿ ᐊᓂᔑᓂᓂᐘᐠ, ᐃᒪ ᑲᐏᒋᓭᐠ ᑲᐃᔑᐱᒥᐣᔕᐦᐃᑲᑌᑭᐣ ᑌᐻᐏᓇᐠ ᐅᓇᑯᓂᑫᐏᓂᐠ, ᑲᑭᓇ ᐊᐏᔭᐠ ᐅᑯᒪᐏᓇᐠ ᑲᐏᒋᑢᐘᐨ, ᑲᑲᓇᑌᐣᒋᑲᑌᑭᐣ ᐊᐏᔭᐠ ᐅᒥᓂᑯᓱᐏᓂᐘᐣ, ᑲᐏᐣ ᒪᒉᐣᒋᑫᐏᐣ ᐁᑿ ᒥᓄᑌᐻᔦᐣᑕᒧᐏᓂᐠ,

ᒋᔕᔑᑭᒪᑲᓄᐘᐨ ᐃᒪ ᐸᐸᑲᐣ ᐅᑯᒪᐏᓇᐣ ᒋᐱᒥᐣᔕᐦᐊᒧᐘᐨ ᐁᑿ ᒋᒥᓄᐘᐍᓇᐦᑐᐘᒋᐣ ᑲᑭᓇ ᑲᐃᓯᓭᓂᑭᐣ ᒋᑐᑕᒧᐘᒋᐣ ᐃᑵᓂᐘᐠ ᐅᒋ ᐊᓂᔑᓂᓂᐘᐠ ᐃᒪ ᒥᓯᐍ ᐱᑯ ᐊᐦᑭᐠ ᐊᐸᒋᒋᑲᓇᐣ, ᐃᑵᓂᐘᐣ ᒪᔭᒼ ᐊᐏᔭᐠ ᐅᒥᓂᑯᓱᐏᓂᐘᐣ, ᒋᑕᔑᑕᒧᐘᒋᐣ ᐁᑿ ᒋᐏᒋᐦᐃᑎᐘᐨ ᐊᐏᔭᐠ ᑲᐸᑲᒥᐡᑲᑯᐘᐨ,

ᑲᐘᐏᒋᑲᑌᐠ ᑲᒪᒪᐏᓂᑲᑌᑭᐣ ᐸᐸᑲᐣ ᐊᐦᑭᐣ ᐅᑯᒪᐏᓇᐣ ᐁᑭᒋᓀᐣᑕᑿᓂᓂᐠ ᐁᑿ ᐁᐱᒥᑲᓇᐘᐸᒥᑯᓯᐘᐨ ᒋᐱᒥᓇᑯᑐᐘᐨ ᐁᑿ ᒋᑲᓇᐍᐣᑕᒧᐘᐨ ᐅᒥᓂᑯᓱᐏᓂᐘᐣ ᐊᓂᔑᓂᓂᐘᐠ,

ᑌᐻᒋᑲᑌᐠ ᐅᐍ ᑭᒋ ᐃᑭᑐᐏᐣ ᑭᒋᓂᑲᓂᐡᑲᐏᐣ ᑫᐏᒋ ᓂᐦᐢᑕᐏᓂᑲᑌᑭᐣ, ᓇᑯᒋᑲᑌᑭᐣ ᐁᑿ ᑲᓇᐍᐣᑕᑿᑭᐣ ᐅᒥᓂᑯᓱᐏᓂᐘᐣ ᐁᑿ ᐅᐸᐣᐢᑫᓱᓂᐘᐣ ᐊᓂᔑᓂᓂᐘᐠ ᐃᒪ ᑲᐃᔑᐘᐍᓇᐦᒋᑲᑌᑭᐣ ᑲᓇᑕᐍᐣᑕᑿᑭᐣ ᑐᑕᒧᐏᓇᐣ ᐃᒪ ᐅᒋ ᑲᒪᒪᐏᓂᑲᑌᑭᐣ ᐸᐸᑲᐣ ᐊᐦᑭᐣ ᐅᑯᒪᐏᓇᐣ ᐱᒧᒋᑫᐏᓂᐠ ᐅᒪ ᐃᓀᑫ,

ᒋᓂᐦᐢᑕᐏᓂᑲᑌᐠ ᐁᑿ ᒋᑫᒋᓇᒋᑲᑌᐠ ᐊᓂᔑᓂᓂᐘᐠ ᒋᒥᓂᑯᓯᐘᐨ ᐁᑲ ᐃᐍᓂ ᒋᐏᒋ ᒪᒋᑐᑕᑫᒪᑲᓂᓂᐠ ᐃᒪ ᒥᓯᐍ ᐊᐏᔭᐠ ᐅᒥᓂᑯᓱᐏᓂᐘᐠ ᑲᐃᔑ ᓂᐦᐢᑕᐏᓂᑲᑌᐠ ᐃᒪ ᒥᓯᐍ ᐊᐦᑭᐠ ᐅᓇᑯᓂᑫᐏᓂᐠ, ᐁᑿ ᐊᓂᔑᓂᓂᐘᐠ ᒋᑕᑯᓇᒧᐘᐨ ᒪᒪᐅ ᒥᓂᑯᓱᐏᓇᐣ ᐁᑲ ᑫᑫᐏᒋ ᓂᑲᑌᓂᑲᑌᓂᑭᐣ ᐃᐍᓂ ᑫᐏᒋ ᐱᒪᒋᐦᐅᐘᐨ, ᑫᐏᒋ ᒥᓄᔭᐘᐨ ᐁᑿ ᑲᐃᔑ ᒪᒪᐅ ᐘᐍᓇᐦᒋᑲᓂᐘᐠ ᐃᑵᓂᐘᐠ ᐅᒋ ᐊᐏᔭᐠ ᐱᑯ,

ᒋᓂᐦᐢᑕᐏᓂᑲᑌᐠ ᑲᐃᓯᓭᐘᐨ ᐊᓂᔑᓂᓂᐘᐠ ᐸᐸᑲᓂᓭ ᐸᐸᑲᐣ ᑕᔑᑫᐏᓂᐠ ᐃᓀᑫ ᐁᑿ ᐸᐸᑲᐣ ᐊᐦᑭᐠ ᐁᑿ ᑲᐏᒋ ᑭᒋᓀᐣᑕᑿᐠ ᒥᓯᐍ ᐊᐦᑭᐠ ᐁᑿ ᑌᑎᐸᐦᐃ ᑫᑯᓇᐣ ᑲᐃᔑᓭᑭᐣ ᑫᑯᓇᐣ ᐁᑿ ᐸᐸᑲᐣ ᐅᑕᓇᐠ ᐃᓯᓭᐏᓇᐣ ᐁᑿ ᐃᔑᐱᒪᑎᓱᐏᓇᐣ ᑕᑭ ᐊᔑᒋᒪᒥᑎᓀᐣᒋᑲᑌᐘᐣ ᑲᔦ,

ᑭᒋᐏᒋᑲᑌ ᐃᐍ ᑲᒪᒪᐏᓂᑲᑌᑭᐣ ᐸᐸᑲᐣ ᐊᐦᑭᐣ ᐅᑯᒪᐏᓇᐣ ᑭᒋ ᐃᑭᑐᐏᐣ ᐃᐍᓂ ᐅᒋ ᐅᒥᓂᑯᓱᐏᓂᐘᐣ ᐊᓂᔑᓂᓂᐘᐠ ᑲᐃᔑᓇᑿᐠ ᑌᐱᓂᑫᐏᐣ ᑫᐃᔑᐱᒥᐣᔕᐦᐃᑲᑌᐠ ᐊᐦᒐᑯᓇᐠ ᐅᒋ ᐃᓀᑫ ᐏᒋᐏᑐᐏᐣ ᐁᑿ ᒪᒪᐅ ᑲᓇᑌᐣᑕᒧᐏᓂᐠ:

ᒪᓯᓇᐦᐃᑫᐏᐣ 1

ᐊᓂᔑᓂᓂᐘᐠ ᒥᓂᑯᓯᐘᐠ ᒥᓯᐍ ᐱᑯ ᐊᓄᐦᑭᐏᓂᓂ, ᒪᒪᐅ ᓇᐣᑕ ᑲᐃᔑ ᐸᐯᔑᑯᐘᐨ, ᑲᑭᓇ ᐃᑵᓂᐘᐣ ᐊᐏᔭᐠ ᐅᒥᓂᑯᓱᐏᓂᐘᐣ ᐁᑿ ᐅᐸᐣᐢᑵᓱᐏᓂᐘᐣ ᑲᐃᔑ ᓂᐦᐢᑕᐏᓂᑲᑌᓂᐠ ᐃᒪ ᑲᐃᔑ ᐅᔑᐱᐦᐃᑲᑌᓂᑭᐣ ᑲᒪᒪᐏᓂᑲᑌᑭᐣ ᐸᐸᑲᐣ ᐊᐦᑭᐣ ᐅᑯᒪᐏᓇᐣ, ᒥᓯᐍ ᐱᑯ ᑭᒋ ᐃᑭᑐᐏᐣ ᐃᒪ ᐊᐏᔭᐠ ᐅᒥᓂᑯᓱᐏᓂᐘᐠ^{Note de bas de page 4} ᐁᑿ ᒥᓯᐍ ᐱᑯ ᐊᐦᑭᐠ ᐊᐏᔭᐠ ᐅᒥᓂᑯᓱᐏᓂᐘᐠ ᐅᓇᑯᓂᑫᐏᓇᐣ᙮

ᒪᓯᓇᐦᐃᑫᐏᐣ 2

ᐊᓂᔑᓂᓂᐘᐠ ᐁᑿ ᑲᐃᔑ ᐸᐯᔑᑯᐘᐨ ᐊᐏᔭᐠ ᐸᐣᐢᑵᓯᐘᐠ ᐁᑿ ᑕᐱᑕᐏᓭᐘᐠ ᐃᑵᓂᐘᐣ ᐅᒋ ᑲᑭᓇ ᑯᑕᐃᔭᐣ ᐊᐏᔭᐣ ᐁᑿ ᐊᐏᔭᐣ ᐁᑿ ᒥᓂᑯᓯᐘᐠ ᒋᐸᐣᐢᑵᓯᐘᐨ ᐃᒪ ᐊᓂᑯ ᑲᐃᔑᓇᑿᓂᓂᐠ ᒪᒉᓂᒧᐍᐏᓂᐠ, ᐊᐸᒋᑐᐘᒋᐣ ᐅᒥᓂᑯᓱᐏᓂᐘᐣ, ᐃᒪ ᒪᔭᒼ ᑲᐏᒋᓭᓂᐠ ᐅᑕᓂᔑᓂᓂᐏᐘᐠ ᓇᐣᑕ ᑲᐅᒋᐘᐨ ᐅᑎᔑᐱᒪᑎᓱᐏᓂᐘᐠ᙮

ᒪᓯᓇᐦᐃᑫᐏᐣ 3

ᐊᓂᔑᓂᓂᐘᐠ ᒥᓂᑯᓯᐘᐠ ᒋᐯᔑᑯᐱᒧᐣᑎᓯᐘᐨ᙮ ᑌᐻᔦᑕᑿᐣ ᐃᐍᓂ ᐅᒋ ᒥᓂᑯᓱᐏᓂᐠ ᐁᐸᐣᐢᑵᓭᐘᐨ ᒋᐏᓀᐣᑕᒧᐘᐨ ᐊᐣ ᑫᐃᔑᓇᑿᓂᓂᑭᐣ ᐅᑐᑯᒪᐏᓂᐘᐠ ᑲᐃᔑᓭᓂᐠ ᐁᑿ ᒋᐸᐣᐢᑵᓭᐘᐨ ᒋᐱᒥᐣᔕᐦᐊᒧᐘᐨ ᑲᔓᓂᔭᑫᓭᓂᐠ ᐊᓄᐦᑭᐏᐱᒧᒋᑫᐏᓇᐣ, ᐘᐏᒋᐏᑐᐏᓂᐠ ᐁᑿ ᐃᔑᐱᒪᑎᓱᐏᓂᐠ ᐘᐍᓇᐦᒋᑫᐏᓇᐣ᙮

ᒪᓯᓇᐦᐃᑫᐏᐣ 4

ᐊᓂᔑᓂᓂᐘᐠ, ᑲᔭᐸᒋᑐᐘᐨ ᐅᒥᓂᑯᓱᐏᓂᐘᐣ ᑫᐏᒋ ᐯᔑᑯ ᐱᒧᐣᑎᓯᐘᐨ, ᒥᓂᑯᓯᐘᐠ ᒋᐯᔑᑯ ᐱᒧᐣᑎᓯᐘᐨ ᐅᑯᒪᐏᓇᐠ ᐃᐍᓂ ᐅᒋ ᑫᒍᐍ ᑫᑯᓇᐣ ᐅᑎᓭᐏᓂᐘᐣ ᐁᑿ ᐅᑕᔑᑫᐏᓂᐘᐠ ᐅᑎᓭᐏᓂᐘᐣ, ᐁᑿ ᑲᔦ ᑫᐏᒋ ᐅᑎᓇᐘᐨ ᔓᓂᔭᓇᐣ ᑫᐏᒋ ᐱᒧᑐᐘᒋᐣ ᐅᐯᔑᑯᐱᒧᒋᑫᐏᓂᐘᐣ᙮

ᒪᓯᓇᐦᐃᑫᐏᐣ 5

ᐊᓂᔑᓂᓂᐘᐠ ᒥᓂᑯᓯᐘᐠ ᒋᐱᒥᐸᒥᑐᐘᐨ ᐁᑿ ᒋᒪᐡᑲᐏᑐᐘᐨ ᑲᐃᔑᐸᑲᓂᓇᑿᓂᓂᑭᐣ ᐅᑐᑯᒪᐏᓂᐘᐠ, ᐅᑐᓇᑯᓂᑫᐏᓂᐘᐣ, ᑲᔓᓂᔭᑫᒪᑲᓂᓂᑭᐣ ᐊᓄᐦᑭᐏᐱᒧᒋᑫᐏᓇᐣ, ᐘᐏᒋᐏᑐᐏᓂᐠ ᐁᑿ ᐅᑎᔑᐱᒪᑎᓱᐏᓂᐘᐠ ᐅᐱᒧᒋᑫᐏᑲᒥᑯᐘᐣ, ᒣᑿᐨ ᐱᒥᑲᓇᐍᐣᑕᒧᐘᐨ ᐅᒥᓂᑯᓱᐏᓂᐘᐣ ᒋᐏᒋᑢᐘᐨ ᒥᓯᐍ ᐱᑯ, ᑭᐡᐱᐣ ᐘᑐᑕᒧᐘᑵᐣ ᐃᐍᓂ, ᐃᒪ ᐅᑐᑯᒪᐏᓂᐘᐠ, ᑲᔓᓂᔭᑫᒪᑲᓂᓂᑭᐣ ᐊᓄᐦᑭᐏᐱᒧᒋᑫᐏᓇᐣ, ᐘᐏᒋᐏᑐᐏᓂᐠ ᐁᑿ ᐅᑎᔑᐱᒪᑎᓱᐏᓂᐘᐣ ᐃᒪ ᐱᐠᓯᔭᐦᑭᐠ᙮

ᒪᓯᓇᐦᐃᑫᐏᐣ 6

ᑲᑭᓇ ᐊᓂᔑᓂᓂᐘᐠ ᒥᓂᑯᓯᐘᐠ ᒥᓯᐍ ᐊᐦᑭᐠ ᒋᐏᒋᑎᐯᐣᑕᑯᓯᐘᐨ᙮

ᒪᓯᓇᐦᐃᑫᐏᐣ 7

1. ᐊᓂᔑᓂᓂᐘᐠ ᒥᓂᑯᓯᐘᐠ ᒋᐱᒪᑎᓯᐘᐨ, ᒥᔭᐏᐠ ᐁᑿ ᒪᒥᑐᓀᐣᒋᑲᓂᐠ ᑲᓇᑌᓂᒥᑎᓱᐏᓂᐠ, ᐸᐣᐢᑵᓱᐏᓂᐠ ᐁᑿ ᑫᐏᒋ ᒥᓄᔭᐨ ᐊᐏᔭ᙮

2. ᐊᓂᔑᓂᓂᐘᐠ ᒪᒪᐅ ᒥᓂᑯᓯᐘᐠ ᒋᐱᒪᑎᓯᐘᐨ ᐸᐣᐢᑵᓭᐏᓂᐠ, ᐸᔭᑕᑫᓂᒧᐏᓂᐠ ᐁᑿ ᒥᓄᔭᐏᓂᐠ ᑲᐃᔑ ᐸᑲᓀᐣᑕᑯᓯᐘᐨ ᐊᐏᔭᐠ ᐁᑿ ᐁᑲ ᒋᐏᒋ ᓂᔑᐘᓇᒋᐦᐊᑲᓄᐘᐨ ᓇᐣᑕ ᑯᑕᑭᔭᐣ ᒪᓂᑐᑕᑫᐏᓂᐠ ᒋᐏᒋ ᑐᑕᐘᑲᓄᐘᐨ, ᐃᐍᓂ ᑲᔦ ᐅᑕᐱᓇᑲᓄᓂᐨ ᐅᓂᒐᓂᔑᐘᐣ ᐃᒪ ᑲᐏᒋᓂᐨ ᐊᐦᐱᐣ ᒥᓇᐘ ᐸᑲᐣ ᑲᑕᔑᑲᓇᐍᐣᑕᑯᓯᓂᐨ᙮

ᒪᓯᓇᐦᐃᑫᐏᐣ 8

1. ᐊᓂᔑᓂᓂᐘᐠ ᐁᑿ ᐊᐏᔭᐠ ᒥᓂᑯᓯᐘᐠ ᐁᑲ ᒋᑲᑵ ᒪᒪᐏᓇᑲᓄᐘᐨ ᐃᒪ ᐸᑲᐣ ᐊᐏᔭᐠ ᑲᐃᔑᐱᒪᑎᓯᐘᐨ ᓇᐣᑕ ᑲᔦ ᒋᓂᔑᐘᓇᒋᒋᑲᑌᓂᐠ ᐅᑎᔑᐱᒪᑎᓱᐏᓂᐘᐣ᙮

2. ᐱᐠᓯᔭᐦᑭᐣ ᐅᑲᑿᔭᑎᓇᓇᐘᐣ ᑫᐃᐤᐦᐃ ᒥᓄᓭᓂᑭᐣ ᐱᒧᒋᑫᐏᓇᐣ ᑫᐏᒋ ᑭᐱᑎᓂᑲᑌᑭᐣ, ᐁᑿ ᑫᐃᔑ ᓇᐱᐘᐍᐡᒋᑲᑌᑭᐣ:

(a) ᐊᓂᑯ ᐃᐍ ᑐᑕᒧᐏᐣ ᑫᑭᐏᒋ ᐅᑕᐱᓂᑲᑌᓂᑭᐣ ᐅᑲᓇᑌᓂᒥᑎᓱᐏᓂᐘᐣ ᑲᐃᔑᐸᑲᓀᐣᑕᑯᓯᐘᐨ ᐊᐏᔭᐠ, ᓇᐣᑕ ᐃᐍᓂ ᐅᑎᔑᐱᒪᑎᓱᐏᓂᐘᐣ ᓇᐣᑕ ᐃᐍᓂ ᐅᑎᐯᐣᑕᑯᓱᐏᓂᐘᐣ;

(b) ᐊᓂᑯ ᐃᐍ ᑐᑕᒧᐏᐣ ᑫᑭᐏᒋ ᐅᑕᐱᓂᑲᑌᓂᑭᐣ ᐅᑕᐦᑭᒥᐘᐣ, ᐅᑕᔑᑫᐏᓂᐘᐣ ᓇᐣᑕ ᐅᑕᐸᒋᒋᑲᓂᐘᐣ;

(c) ᐊᓂᑯ ᑲᐃᔑᓇᑿᐠ ᑲᔭᑕᐦᓴᑲᓄᐘᐨ ᐊᐏᔭᐠ ᑫᐏᒋ ᓂᔑᐘᓇᒋᒋᑲᑌᓂᑭᐣ ᐦᓇᐣᑕ ᐁᑲ ᒋᓂᐦᐢᑕᐏᓂᑲᑌᓂᑭᐣ ᐅᒥᓂᑯᓱᐏᓂᐘᐣ;

(d) ᐊᓂᑯ ᑲᐃᔑᓇᑿᐠ ᑲᐃᔑᒪᒪᐏᓇᑲᓄᐘᐨ ᐃᒪ ᐸᑲᐣ ᐊᐏᔭᐣ ᑲᐃᔑᐱᒪᑎᓯᓂᐨ;

(e) ᐊᓂᑯ ᑲᐃᔑᓇᑿᐠ ᑲᐃᔑᑲᑵᐏᓇᐦᒋᑲᑌᓂᑭᐣ ᑫᐏᒋ ᓇᑯᒋᑲᑌᓂᐠ ᓇᐣᑕ ᒋᒪᒋᒋᑲᑌᓂᐠ ᑫᐏᒋ ᒪᒉᓂᒪᑲᓄᐘᐨ ᓇᐣᑕ ᒪᓂᑐᑕᐘᑲᓄᐘᐨ ᐃᐍᓂ ᐅᒋ ᑲᐏᒋᑎᐯᐣᑕᑯᓯᐘᐨ ᐃᒪ ᐃᓀᑫ᙮

ᒪᓯᓇᐦᐃᑫᐏᐣ 9

ᐊᓂᔑᓂᓂᐘᐠ ᐁᑿ ᐊᐏᔭᐠ ᒥᓂᑯᓯᐘᐠ ᒋᐤᒋᑎᐯᐣᑕᑯᓯᐘᐨ ᐊᓂᔑᓂᓂᐏ ᑕᔑᑫᐏᓂᐠ ᓇᐣᑕ ᐅᑯᒪᐏᓇᐠ, ᐃᒪ ᑲᐃᔑᓇᐱᓭᐠ ᑲᔭᐡ ᑐᑕᒧᐏᓂᐠ ᐁᑿ ᐅᑎᔑᐱᒪᑎᓱᐏᓂᐘᐠ ᐃᒪ ᑕᔑᑫᐏᓂᐠ ᐁᓇᐣᑕ ᐅᑯᒪᐏᓇᐠ ᑲᐃᔑ ᐃᓯᓭᐠ᙮ ᑲᐏᐣ ᑫᑯᐣ ᐊᓂᑯ ᐁᐃᔑᓇᑿᐠ ᒪᒋᓀᓂᒥᑐᐏᐣ ᑕᐏᒋᓭᓯᓄᐣ ᐃᒪ ᑲᑐᒋᑲᑌᐠ ᐃᐍᓂ ᐅᒥᓂᑯᓱᐏᓂᐘᐣ᙮

ᒪᓯᓇᐦᐃᑫᐏᐣ 10

ᐊᓂᔑᓂᓂᐘᐠ ᑲᐏᐣ ᑕᓂᑲᑌᓇᑲᓄᓯᐘᐠ ᐃᒪ ᐅᑕᐦᑭᒥᐘᐠ ᐁᑿ ᐅᑕᔑᑫᐏᓂᐘᐠ᙮ ᑲᐏᐣ ᑕᔭᑕᓴᑲᓄᐘᐠ ᐁᑲ ᐸᐣᐢᑵᓱᐏᓂᐠ ᐅᒋ ᐅᓀᐣᑕᒧᐘᐨ, ᒷᔦ ᐁᑿ ᐏᑕᒪᑫᐏᓂᐠ ᐸᑭᑎᐣᑎᓱᐏᓂᐠ ᐃᑵᓂᐘᐠ ᐅᒋ ᐊᓂᔑᓂᓂᐘᐠ ᑲᐸᑲᒥᐡᑲᑯᐘᐨ ᐁᑿ ᐃᐡᑿ ᑌᐻᑕᑎᓇᓂᐘᐠ ᑌᐻᐏᓇᐠ ᐁᑿ ᑕᐱᑕᐅ ᑎᐸᐦᐃᑫᐏᐣ ᐁᑿ, ᐊᐣᑎ ᑫᐃᔑ ᐃᓯᓭᑵᐣ, ᓇᐣᑕ ᒋᑭᐱᑭᐍᓇᓂᐘᐠ ᑲᔦ᙮

ᒪᓯᓇᐦᐃᑫᐏᐣ 11

1. ᐊᓂᔑᓂᓂᐘᐠ ᒥᓂᑯᓯᐘᐠ ᒋᔭᐸᒋᑐᐘᐨ ᐁᑿ ᒋᑭᐍᐱᒪᒋᑐᐘᐨ ᐅᑎᔑᐱᒪᑎᓱᐏᓂᐘᐣ ᑲᔭᐡ ᑐᑕᒧᐏᓂᐠ ᐁᑿ ᐅᑐᑕᒧᐏᓂᐘᐣ᙮ ᐊᔑᑎᓂᑲᑌᐘᐣ ᒥᓂᑯᓱᐏᓇᐣ ᒋᐱᒥᐸᒥᒋᑲᑌᑭᐣ, ᒋᑲᓇᐍᐣᑕᑿᑭᐣ ᐁᑿ ᒋᐘᐍᓇᐦᒋᑲᑌᑭᐣ ᐅᑕᓇᐠ ᑫᑯᓇᐣ, ᓄᑯᒼ ᑫᑯᓇᐣ ᐁᑿ ᓂᑲᓂᐠ ᑫᔭᓂᑕᑿᑭᐣ ᑫᑯᓇᐣ ᐅᑎᔑᐱᒪᑎᓱᐏᓂᐘᐠ, ᑐᑲᐣ ᒋᐸᐃ ᑫᑯᓇᐣ ᐁᑿ ᐍᐡᑲᐨ ᑲᑭᑕᔑᑫᓇᓂᐘᑭᐸᐣ, ᑫᑌ ᑫᑯᓇᐣ, ᐘᐍᐡᒋᑫᐏᓇᐣ, ᐊᒐᑯᐱᒧᒋᑫᐏᓇᐣ, ᐊᐸᒋᒋᑲᓇᐣ ᐁᑿ ᐅᔑᐱᐦᐃᑫᐏᓇᐣ ᐁᑿ ᑲᑭᑕᐏᑐᑕᒧᐏᓇᐣ ᐁᑿ ᑎᐸᒋᒧᐘᓯᓇᐦᐃᑫᐏᓇᐣ᙮

2. ᐱᐠᓯᔭᐦᑭᐣ ᐅᑯᒪᐏᓇᐣ ᐅᑲᑿᔭᑎᓇᓇᐘᐣ ᑫᐏᒋ ᑭᐍ ᐅᐡᒋᑲᑌᑭᐣ ᑫᐃᔑ ᐃᓄᓭᑭᐣ ᑐᑕᒧᐏᓇᐣ, ᐃᑵᓂᐘᐣ ᑲᔦ ᓇᐸᐦᑕᒪᑫᐏᓇᐣ, ᑲᑭᔑ ᐘᐍᓇᐦᒋᑲᑌᑭᐣ ᑲᑭᔑ ᐏᒋᑢᐘᐨ ᐊᓂᔑᓂᓂᐘᐠ, ᐃᐍᓂ ᐅᒋ ᐅᑎᔑᐱᒪᑎᓱᐏᓂᐘᐣ, ᐅᑭᑫᐣᑕᒪᐏᓂᐘᐣ, ᐅᑕᔭᒥᒋᑫᐏᓂᐘᐣ ᐁᑿ ᐅᑕᐦᒐᑯᐏᓂᐘᐣ ᑫᑯᓇᐣ ᑲᑭᐅᑕᐱᓂᑲᑌᓂᑭᐸᐣ ᐁᑲ ᐏᓇᐘ ᓂᑲᓂᐠ ᑲᑭᐏᒋ ᐏᑕᒷᑲᓄᐘᐨ ᓇᐣᑕ ᑲᑭᐏᒋ ᐸᑭᑎᓇᒧᐘᐨ ᓇᐣᑕ ᑲᑭᐱᑯᓂᑲᑌᓂᑭᐣ ᐅᑐᓇᑯᓂᑫᐏᓂᐘᐣ, ᑲᔭᐡ ᐅᑐᑕᒧᐏᓂᐘᐣ ᐁᑿ ᐅᑎᔑᐱᒪᑎᓱᐏᓂᐘᐣ᙮

ᒪᓯᓇᐦᐃᑫᐏᐣ 12

1. ᐊᓂᔑᓂᓂᐘᐠ ᒥᓂᑯᓯᐘᐠ ᒋᔭᓂᒧᑭᒪᑲᓂᓂᑭᐣ, ᒋᑐᑕᒧᐘᒋᐣ, ᒋᐘᐍᓇᐦᑐᐘᒋᐣ ᐁᑿ ᒋᑭᑭᓄᐦᐊᒪᑫᐘᒋᐣ ᐅᑕᐦᒐᑯᓂᐘᐠ ᐁᑿ ᐅᑕᔭᒥᐦᐊᐏᓂᐘᐠ ᐅᑐᑕᒧᐏᓂᐘᓇᐣ, ᐅᑎᔑᐱᒪᑎᓱᐏᓂᐘᐠ ᐁᑿ ᐅᑲᓇᒋᑐᑕᒧᐏᓂᐘᐣ; ᒥᓂᑯᓯᐘᐠ ᒋᐱᒥᐸᒥᑐᐘᐨ, ᒋᑲᓇᐍᐣᑕᒧᐘᐨ, ᐁᑿ ᒋᑌᐱᓇᒧᐘᐨ ᑲᐃᔑᐯᔑᑯᐘᐨ ᐃᑵᓂᐘᐣ ᐅᑕᔭᒥᒋᑫᐏᓂᐘᐣ ᐁᑿ ᐅᑎᔑᐱᒪᑎᓱᐏᓂᐘᐣ ᑲᑕᔑᑐᒋᑲᑌᑭᐣ ᐊᐦᑯ; ᒥᓂᑯᓯᐘᐠ ᒋᑭᐍᒥᓇᑲᓄᐘᒋᐣ ᐅᒋᐸᔨᒥᐘᐣ᙮

2. ᐱᐠᓯᔭᐦᑭᐣ ᐅᑯᒪᐏᓇᐣ ᑕᑭᐏᒋ ᐘᐸᒋᑲᑌ ᑫᑭᐏᒋ ᑌᐱᓇᒧᐘᒋᐣ ᐁᑿ/ᓇᐣᑕ ᒋᑭᐍ ᒥᓇᑲᓄᐘ ᑲᓇᒋᑐᑕᒧᐏᓇᐣ ᐊᐸᒋᒋᑲᓇᐣ ᐁᑿ ᐅᒋᐸᔨᒥᐘᐣ ᒋᑎᐯᐣᑕᒧᐘᒋᐣ ᐃᒪ ᐅᒋ ᑕᐱᑕᐏᓭᓂᐠ, ᓇᑯᒋᑫᐏᓂᐠ ᐁᑿ ᑲᐃᔑ ᒥᓄᓭᑭᐣ ᑐᑕᒧᐏᓇᐣ ᑲᑭᔑ ᐘᐍᓇᐦᒋᑲᑌᑭᐣ ᑲᑭᔑ ᐏᒋᑢᐘᐨ ᐊᓂᔑᓂᓂᐘᐠ ᑲᐸᑲᒥᐡᑲᑯᐘᐨ᙮

ᒪᓯᓇᐦᐃᑫᐏᐣ 13

1. ᐊᓂᔑᓂᓂᐘᐠ ᒥᓂᑯᓯᐘᐠ ᒋᑭᐍ ᐱᒪᒋᑐᐘᐨ, ᒋᔭᐸᒋᑐᐘᐨ, ᒋᐘᐍᓇᐦᑐᐘᐨ ᐁᑿ ᓂᑲᓂᐠ ᒋᓇᐦᑐᐘᐨ ᐅᑕᓇᐠ ᑲᑭᔑᐱᒪᑎᓯᐘᐸᐣ, ᐅᑎᔑᑭᔑᐍᐏᓂᐘᐣ, ᐅᑕᔭᒧᐏᓂᐘᐣ ᑲᔭᐡ ᑲᑭᐱᑐᑕᒧᐘᐨ, ᑲᐃᔑ ᐘᐸᑕᒧᐘᐨ ᑫᑯᓇᐣ, ᐅᒪᓯᓇᐦᐃᑫᐏᓂᐘᐣ ᐁᑿ ᐅᑎᐸᒋᒧᐘᓯᓇᐦᐃᑫᐏᓂᐘᐣ, ᐁᑿ ᒋᐘᐍᓇᐦᑌᐠ ᐁᑿ ᒋᑲᓇᐍᐣᑕᒧᐘᐨ ᑎᐱᓇᐍ ᑲᑭ ᐃᔑᓂᑲᑕᒧᐘᒋᐣ ᐅᑕᔑᑫᐏᓂᐘᐣ, ᑫᑯᓇᐣ ᐊᐦᑭᐠ ᑲᑭ ᐃᔑᓂᑲᑕᒧᐘᐨ ᐁᑿ ᐊᐏᔭᐣ ᑲᔦ ᑲᑭ ᐃᔑᓂᑲᓇᐘᐨ᙮

2. ᐱᐠᓯᔭᐦᑭᐣ ᐅᑯᒪᐏᓇᐣ ᑫᐃᔑ ᒥᓄᓭᓂᐠ ᑕᐃᔑ ᐘᐍᓇᐦᒋᑫᐘᐠ ᑫᒋᓇᐨ ᐅᐍᓂ ᒥᓂᑯᓱᐏᓂᓂ ᒋᑲᓇᐍᐣᑕᑿᓂᓂᐠ ᐁᑿ ᑫᒋᓇᐨ ᐊᓂᔑᓂᓂᐘᐠ ᒋᑭᑫᐣᑕᒧᐘᐨ ᐁᑿ ᒋᑭᑫᓂᒪᑲᓄᐘᐨ ᐃᒪ ᐅᑯᒪᐏᓇᐠ, ᐅᓇᑯᓂᑫᐏᓂᐠ ᐁᑿ ᒪᓯᓇᐦᐃᑫᐏ ᐱᒧᒋᑫᐏᓂᐠ, ᐊᐣᑎ ᐱᑯ ᐁᐃᔑ ᓇᑕᐍᐣᑕᑿᓂᑵᐣ ᐃᒪ ᑿᔭᑎᓂᑫᐏᓂᐠ ᑲᐃᔑ ᐃᓂᐍᒋᑲᑌᐠ ᓇᐣᑕ ᑯᑕᑭᐠ ᑫᑯᓇᐣ ᑐᑕᒧᐏᓂᐠ᙮

ᒪᓯᓇᐦᐃᑫᐏᐣ 14

1. ᐊᓂᔑᓂᓂᐘᐠ ᒥᓂᑯᓯᐘᐠ ᒋᐘᐍᓇᐦᑐᐘᐨ ᐁᑿ ᒋᑎᐯᐣᑕᒧᐘᐨ ᐅᑭᑭᓄᐦᐊᒪᑫᐏ ᐱᒧᒋᑫᐏᓂᐘᐣ ᐁᑿ ᐱᒧᒋᑫᐏᑲᒥᑯᐣ ᑲᐏᒋ ᑿᔭᑎᓂᑲᑌᑭᐣ ᑭᑭᓄᐦᐊᒪᑫᐏᓇᐣ ᐅᑎᔑᑭᔑᐍᐏᓂᐘᐠ, ᑲᐃᔑ ᒥᓄᓭᓂᐠ ᐃᒪ ᐅᑎᔑᐱᒪᑎᓱᐏᓂᐘᐠ ᑲᑐᒋᐠᑕᑭᐣ ᑫᑯᓇᐣ ᐃᒪ ᑭᑭᓄᐦᐊᒪᑫᐏᓂᐠ ᐁᑿ ᑲᐏᒋᑭᑫᐣᒋᑲᑌᑭᐣ ᑫᑯᓇᐣ᙮

2. ᐊᓂᔑᓂᓂᐘᐠ ᑲᐃᔑ ᐸᐯᔑᑯᐘᐨ, ᐃᑵᓂᐘᐠ ᒪᐘᐨ ᐊᐘᔑᔕᐠ, ᒥᓂᑯᓯᐘᐠ ᐊᓂᑯ ᑲᔭᐱᒋᓭᓂᐠ ᐁᑿ ᑐᑲᐣ ᑭᑭᓄᐦᐊᒪᑫᐏᓂᓂ ᐃᒪ ᐱᐠᓯᔭᐦᑭᐠ ᐁᑲ ᒋᐏᒋ ᒪᒉᓂᒪᑲᓄᐘᐨ᙮

3. ᐱᐠᓯᔭᐦᑭᐣ ᐅᑯᒪᐏᓇᐣ, ᑲᑭᐏᒋᑢᐘᐨ ᐊᓂᔑᓂᓂᐘᐠ, ᑫᐃᔑᒥᓄᓭᓂᐠ ᐅᑲᑐᑕᓇᐘ, ᑫᐏᒋ ᐃᓯᓭᓂᐠ ᐊᐏᔭᐠ, ᒪᐘᐨ ᐊᐘᔑᔕᐠ, ᐃᑵᓂᐘᐠ ᑲᔦ ᐊᑿᒋᐠ ᑕᔑᑫᐏᓂᐠ ᑲᑲᐯᔑᐘᐨ, ᒋᑌᐱᓇᒧᐘᐨ, ᐊᓇᐦᐱ ᐱᑯ ᐃᓯᓭᓂᐠ, ᑭᑭᓄᐦᐊᒪᑫᐏᓂᓂ ᐅᑎᔑᐱᒪᑎᓱᐏᓂᐘᐠ ᐁᑿ ᒋᔑ ᑿᔭᑎᓂᑲᑌᓂᐠ ᐅᑎᔑᑭᔑᐍᐏᓂᐘᐠ᙮

ᒪᓯᓇᐦᐃᑫᐏᐣ 15

1. ᐊᓂᔑᓂᓂᐘᐠ ᒥᓂᑯᓯᐘᐠ ᒋᑲᓇᑌᐣᑕᑿᓂᓂᐠ ᐁᑿ ᒋᐸᐸᑲᓂᓇᑿᓂᓂᑭᐣ ᐅᑎᔑᐱᒪᑎᓱᐏᓂᐘᐣ, ᑲᔭᐡ ᐅᑐᑕᒧᐏᓂᐘᐣ, ᐅᑕᓇᐠ ᐅᑎᔑᐱᒪᑎᓱᐏᓂᐘᐣ ᐁᑿ ᐅᐸᑯᓭᓂᒧᓂᐘᐣ ᒪᔭᒼ ᒋᔑ ᓇᑿᓂᓂᑭᐣ ᐃᒪ ᑭᑭᓄᐦᐊᒪᑫᐏᓂᐠ ᐁᑿ ᒥᓯᐍ ᐱᑯ ᐏᑕᒪᑫᐏᓂᐠ᙮

2. ᐱᐠᓯᔭᐦᑭᐣ ᐅᑯᒪᐏᓇᐣ ᑫᐃᔑᒥᓄᓭᓂᐠ ᐅᑲᑐᑕᓇᐘ, ᒋᑕᔑᑕᒷᐘᒋᐣ ᐁᑿ ᒋᐏᒋᐦᐊᐘᒋᐣ ᐊᓂᔑᓂᓂᐘᐣ, ᒋᒥᑲᑕᒧᐘᒋᐣ ᒪᐁᓂᒧᐍᐏᓇᐣ ᐁᑿ ᒋᓂᑲᑌᓂᑲᑌᑭᐣ ᒪᓂᑐᑕᑫᐏᓇᐣ ᐁᑿ ᒋᓇᑯᒋᑲᑌᑭᐣ ᔕᔑᐯᓂᒥᑐᐏᓇᐣ, ᑭᑫᐣᑕᑐᐏᓇᐣ ᐁᑿ ᒥᓄᐏᒋᐏᑐᐏᓇᐣ ᐃᑵᓂᐘᐠ ᐅᒋ ᐊᓂᔑᓂᓂᐘᐠ ᐁᑿ ᑲᑭᓇ ᑯᑕᑭᔭᐠ ᐃᒪ ᑲᔭᐘᐨ ᐱᒪᑎᓱᐏᓂᐠ᙮

ᒪᓯᓇᐦᐃᑫᐏᐣ 16

1. ᐊᓂᔑᓂᓂᐘᐠ ᒥᓂᑯᓯᐘᐠ ᒋᐘᐍᓇᐦᑐᐘᐨ ᐅᐏᑕᒪᑫᐏᐱᒧᒋᑫᐏᓂᐠ ᐅᑎᔑᑭᔑᐍᐏᓂᐘᐠ ᐁᑿ ᒋᑌᐱᓇᒧᐘᒋᐣ ᐊᓂᑯ ᐃᑵᓂᐘᐣ ᐁᑲ ᐊᓂᔑᓂᓂᐏ ᐏᑕᒪᑫᐏᐱᒧᒋᑫᐏᓇᐣ ᐁᑲ ᐃᐍᓂ ᒋᐏᒋ ᒪᒋᑲᓇᐘᐸᒪᑲᓄᐘᒋᐣ᙮

2. ᐱᐠᓯᔭᐦᑭᐣ ᐅᑯᒪᐏᓇᐣ ᑫᐃᔑᒥᓄᓭᓂᐠ ᐅᑲᑐᑕᓇᐘ ᑫᒋᓇᐨ ᐃᐍ ᐱᐠᓯᔭᐦᑭᐠ ᑲᐏᒋ ᑎᐯᐣᒋᑲᑌᐠ ᐏᑕᒪᑫᐏᐱᒧᒋᑫᐏᐣ ᒋᓇᑯᑐᐘᒋᐣ ᑲᔦ ᐸᐸᑲᐣ ᐊᓂᔑᓂᓂᐏᐱᒪᑎᓱᐏᓇᐣ᙮ ᐱᐠᓯᔭᐦᑭᐣ ᐅᑯᒪᐏᓇᐣ, ᐁᑲ ᒪᒋᑲᓇᐘᐸᒥᑐᐏᓂᐠ ᑫᒋᓇᐨ ᒥᓯᐍ ᐸᐣᐢᑵᓱᐏᓂᐠ ᒋᔑᓇᑯᒋᑲᑌᑭᐣ, ᒋᔕᔑᑭᒪᑲᓄᐘᒋᐣ ᐊᐏᔭᐠ ᑲᐯᔑᑯ ᑎᐯᐣᑕᒧᐘᒋᐣ ᐏᑕᒪᑫᐏᐱᒧᒋᑫᐏᓇᐣ ᒋᓇᑯᑐᐘᐨ ᐸᐸᑲᐣ ᐊᓂᔑᓂᓂᐏᐱᒪᑎᓱᐏᓇᐣ᙮

ᒪᓯᓇᐦᐃᑫᐏᐣ 17

1. ᐊᓂᔑᓂᓂᐘᐠ ᑲᐃᔑ ᐸᐯᔑᑯᐘᐨ ᐁᑿ ᐊᐏᔭᐠ ᒥᓂᑯᓯᐘᐠ ᒋᒥᓄ ᐊᐸᒋᑐᐘᐨ ᑲᑭᓇ ᐅᒥᓂᑯᓱᐏᓂᐘᐣ ᑲᑭᔑ ᐘᐍᓇᐦᒋᑲᑌᓂᑭᐣ ᐃᒪ ᒥᓯᐍ ᐱᑯ ᐊᐦᑭᐠ ᐁᑿ ᑎᐱᓇᐍ ᐊᓄᐦᑭᐏᓂᐠ ᐅᓇᑯᓂᑫᐏᓂᐠ᙮

2. ᐱᐠᓯᔭᐦᑭᐣ ᐅᑯᒪᐏᓇᐣ ᐅᑲᑕᔑᑕᒷᐘᐣ ᐁᑿ ᐅᑲᐏᒋᐦᐊᐘᐣ ᐊᓂᔑᓂᓂᐘᐣ ᑫᐃᔑ ᒥᓄᓭᐠ ᒋᑐᒋᑲᑌᐠ ᑫᐏᒋ ᑲᓇᐍᐣᑕᑯᓯᐘᐨ ᐊᓂᔑᓂᓂᐏ ᐊᐘᔑᔕᐠ ᐃᒪ ᐅᒋ ᑲᔓᓂᔭᑫᒪᑲᑭᐣ ᐊᓄᐦᑭᐏᐱᒧᒋᑫᐏᓇᐣ ᑲᐏᒋ ᒪᓂᑐᑕᑫᓇᓂᐘᐠ ᐁᑿ ᐁᑲ ᐁᑭᐏᒋ ᐊᓄᐦᑭᓇᓂᐘᐠ ᑫᑭᐏᒋ ᑯᑕᑎᑿᐠ ᓇᐣᑕ ᑫᐏᒋ ᐘᓇᒋᑫᒪᑲᐠ ᐃᒪ ᐊᐘᔑᐡ ᐅᑭᑭᓄᐦᐊᒪᑯᐏᓂᐠ, ᓇᐣᑕ ᑫᐏᒋ ᓂᔑᐘᓇᒋᒋᑫᒪᑲᐠ ᐊᐘᔑᐡ ᐅᒥᓄᔭᐏᓂᐠ ᓇᐣᑕ ᐅᐏᔭᐏᐠ, ᐅᒪᒥᑐᓀᐣᒋᑲᓂᐠ, ᐅᑕᐦᒐᑯᐏᓂᐠ, ᐅᑿᔭᑿᑎᓱᐏᓂᐠ ᓇᐣᑕ ᐘᐏᒋᐏᑐᐏᓂᐠ ᐘᐍᓇᐦᒋᑫᐏᓂᐠ, ᐁᑭᑫᐣᒋᑲᑌᐠ ᑲᐃᔑ ᐘᑫᐏᓯᐘᐨ ᐁᑿ ᑲᑭᒋᓀᐣᑕᑿᐠ ᐃᐍ ᑭᑭᓄᐦᐊᒪᑫᐏᐣ ᑫᐏᒋ ᒪᐡᑲᐍᓂᒧᐘᐨ᙮

3. ᐊᓂᔑᓂᓂᐘᐠ ᑲᐃᔑᐯᔑᑯᐘᐨ ᒥᓂᑯᓯᐘᐠ ᐁᑲ ᒋᔭᓴᑲᓄᐘᐨ ᑫᐏᒋ ᒪᒋᑐᑕᐘᑲᓄᐘᐨ ᐃᒪ ᐊᓄᐦᑭᐏᓂᐠ ᐁᑿ, ᑲᐃᔑᓭᐠ ᐊᐦᑯ, ᐊᓄᐦᑭᐏᓂᐠ ᓇᐣᑕ ᑎᐸᐦᐊᒪᑯᐏᓂᐠ᙮

ᒪᓯᓇᐦᐃᑫᐏᐣ 18

ᐊᓂᔑᓂᓂᐘᐠ ᒥᓂᑯᓯᐘᐠ ᒋᐏᒋᑢᐘᐨ ᐅᓀᐣᒋᑫᐏᓂᐠ ᐃᒪ ᑫᐏᒋ ᐸᑲᒥᐡᑭᑫᒪᑲᓂᓂᑭᐣ ᐅᒥᓂᑯᓱᐏᓂᐘᐣ, ᐃᒪ ᐃᑵᓂᐘᐣ ᑲᔭᐱᑕᒥᓂᐨ ᐏᓇᐘ ᑲᑭᔑᐅᓂᓇᐘᒋᐣ ᑲᓯᐦᐃᓇᐱᓭᓂᐠ ᐃᐍᓂ ᑲᐃᔑᐱᒥᓭᒋᑫᐘᐨ, ᑲᔦ ᒋᐱᒥᐸᒥᑐᐘᐨ ᐁᑿ ᒋᐘᐍᓇᐦᑐᐘᐨ ᐅᑕᓂᔑᓂᓂᐏ ᐅᓀᐣᑕᒪᑫᐏᓂᐠ ᐅᐱᒧᒋᑫᐏᓂᐘᐣ᙮

ᒪᓯᓇᐦᐃᑫᐏᐣ 19

ᐱᐠᓯᔭᐦᑭᐣ ᐅᑯᒪᐏᓇᐣ ᐅᑲᑕᔑᑕᒷᐘᐣ ᐁᑿ ᐅᑲᐏᒋᐦᐊᐘᐣ ᑌᐻᐏᓇᐠ ᐊᓂᔑᓂᓂᐘᐣ ᐃᒪ ᐏᓇᐘ ᐅᑕᐱᑕᒪᑫᐏᐱᒧᒋᑫᐏᓂᐘᐣ ᑫᐏᒋ ᑌᐱᓇᒧᐘᐨ ᐅᐸᐣᐢᑵᓱᐏᓂᐘᐣ, ᒷᔦ ᐁᑿ ᐏᑕᒪᑫᐏᓂᐠ ᐁᐸᑭᑎᓇᒧᐘᐨ ᒋᐏᑕᐱᓂᑲᑌᓂᐠ ᐁᑿ ᒋᐊᓄᐦᑭᓭᒋᑲᑌᓂᐠ ᐅᓇᑯᓂᑫᐏᓂᐠ ᓇᐣᑕ ᒪᓯᓇᐦᐃᑫᐏᓂᐠ ᑐᑕᒧᐏᓇᐣ ᑫᑭᐏᒋ ᐸᑲᒥᐡᑲᑯᐘᒋᐣ᙮

ᒪᓯᓇᐦᐃᑫᐏᐣ 20

1. ᐊᓂᔑᓂᓂᐘᐠ ᒥᓂᑯᓯᐘᐠ ᒋᐱᒥᐸᒥᑐᐘᐨ ᐁᑿ ᒋᐘᐍᓇᐦᑐᐘᐨ ᐅᑐᑯᒪᐏᓂᐘᐠ, ᑲᔓᓂᔭᑫᒪᑲᐠ ᐊᓄᐦᑭᐏᐱᒧᒋᑫᐏᓂᐠ ᐁᑿ ᐘᐏᒋᐏᑐᐏᓂᐠ ᐱᒧᒋᑫᐏᓇᐣ ᓇᐣᑕ ᐱᒧᒋᑫᐏᑲᒥᑯᐣ, ᑫᐏᒋ ᒥᓄᔭᐘᐨ ᒋᒧᒋᑫᐣᑕᒧᐘᐨ ᐃᐍᓂ ᑲᐏᒋ ᐱᒪᒋᐦᐃᑎᓯᐘᐨ ᐁᑿ ᐅᐘᐍᓇᐦᒋᑫᐏᓂᐘᐣ, ᐁᑿ ᒋᐏᒋᑢᐘᐨ ᐅᐸᐣᐢᑵᓱᐏᓂᐘᐠ ᒥᓯᐍ ᐃᒪ ᑲᔭᐡ ᐅᑐᑕᒧᓂᐘᐠ ᐁᑿ ᑯᑕᑭᔭᐣ ᑲᔓᓂᔭᑫᒪᑲᐠ ᐊᓄᐦᑭᐏᐱᒧᒋᑫᐏᓂᐠ ᑐᑕᒧᐏᓇᐣ᙮

2. ᐊᓂᔑᓂᓂᐘᐠ ᑲᑭᐏᒋ ᑭᐱᑎᓂᑲᑌᓂᑭᐣ ᑫᑭᐏᒋ ᐱᒪᒋᐦᐅᐘᐨ ᐁᑿ ᑫᑭᐏᒋ ᐘᐍᓇᐦᒋᑫᐘᐨ ᒥᓂᑯᓯᐘᐠ ᑌᐻᐏᓇᐠ ᐁᑿ ᑕᐱᑕᐅ ᓇᐱᐘᐍᐡᒋᑫᐏᓇᐣ᙮

ᒪᓯᓇᐦᐃᑫᐏᐣ 21

1. ᐊᓂᔑᓂᓂᐘᐠ ᒥᓂᑯᓯᐘᐠ, ᐁᑲ ᒋᐏᒋ ᒪᒋᑐᑕᐘᑲᓄᐘᐨ, ᑫᐏᒋ ᒪᒥᓄᓂᑲᑌᓂᐠ ᑲᔓᓂᔭᑫᒪᑲᐠ ᐊᓄᐦᑭᐏᐱᒧᒋᑫᐏᓂᐠ ᐁᑿ ᐘᐏᒋᐏᑐᐏᓂᐠ ᐃᓯᓭᐏᓇᐣ, ᐃᐍ ᑲᔦ, ᑲᐃᔑᓭᐠ ᐊᐦᑯ, ᐃᒪ ᐃᓀᑫ ᑭᑭᓄᐦᐊᒪᑫᐏᓂᐠ, ᐊᓄᐦᑭᐏᓂᐠ, ᑲᑵᒋᐦᐃᐍᐏᓂᐠ ᐁᑿ ᓇᐱᑲᑵᒋᐦᐃᐍᐏᓂᐠ, ᐘᑲᐦᐃᑫᐏᓂᐠ, ᐍᐱᓂᑫᐏᓂᐠ, ᒥᓄᔭᐏᓂᐠ ᐁᑿ ᐘᐏᒋᐏᑐᐏᓂᐠ ᑲᐃᔑ ᒥᓄᓭᓇᓂᐘᐠ᙮

2. ᐱᐠᓯᔭᐦᑭᐣ ᐅᑯᒪᐏᓇᐣ ᑫᐃᔑ ᒥᓄᓭᓂᐠ ᐅᑲᑐᑕᓇᐘ ᐁᑿ, ᐊᐣᑎ ᑫᐃᔑ ᐊᓄᐦᑭᓭᑵᐣ, ᐸᐸᑲᐣ ᑐᑕᒧᐏᓇᐣ ᑫᒋᓇᐨ ᒋᐱᒥ ᒪᒥᓄᓂᑲᑌᑭᐣ ᑲᔓᓂᔭᑫᒪᑲᑭᐣ ᐊᓄᐦᑭᐏᐱᒧᒋᑫᐏᓂᐠ ᐁᑿ ᐘᐏᒋᐏᑐᐏᓂᐠ ᐃᓯᓭᐏᓇᐣ᙮ ᑕᑲᓇᐘᐸᒋᑲᑌ ᑿᔭᐠ ᐃᐍ ᐅᒥᓂᑯᓱᐏᓂᐘᐣ ᐁᑿ ᑲᒪᔭᑭᓇᑿᓂᓂᑭᐣ ᐅᓇᑕᐍᐣᑕᒪᐏᓂᐘᐣ ᐊᓂᔑᓂᓂᐏᑭᒋᐦᐊᐠ, ᐃᑵᐘᐠ, ᐅᐡᑲᑎᓴᐠ, ᐊᐘᔑᔕᐠ ᐁᑿ ᐊᐏᔭᐠ ᑲᒪᑲᑎᓯᐘᐨ᙮

ᒪᓯᓇᐦᐃᑫᐏᐣ 22

1. ᒪᔭᒼ ᑕᑭᑲᓇᐘᐸᒋᑲᑌ ᐃᐍᓂ ᐅᒥᓂᑯᓱᐏᓂᐘᐣ ᐁᑿ ᑲᐸᑲᓂᓇᑿᓂᓂᑭᐣ ᐅᓇᑕᐍᐣᑕᒪᐏᓂᐘᐣ ᐊᓂᔑᓂᓂᐏᑭᒋᐦᐊᐠ, ᐃᑵᐘᐠ, ᐅᐡᑲᑎᓴᐠ, ᐊᐘᔑᔕᐠ ᐁᑿ ᐊᐏᔭᐠ ᑲᒪᑲᑎᓯᐘᐨ ᐃᒪ ᑫᐃᔑ ᐊᓄᐦᑭᓭᒋᑲᑌᐠ ᐃᐍ ᑭᒋ ᐃᑭᑐᐏᐣ᙮

2. ᐱᐠᓯᔭᐦᑭᐣ ᐅᑯᒪᐏᓇᐣ ᐅᑲᑐᑕᓇᐘᐣ ᑫᑯᓂᓂ, ᒋᐤᒋᑢᓂᐨ ᐊᓂᔑᓂᓂᐘᐣ, ᑫᒋᓇᐨ ᐊᓂᔑᓂᓂᐏ ᐃᑵᐘᐠ ᐁᑿ ᐊᐘᔑᔕᐠ ᒋᒧᒋᑫᐣᑕᒧᐘᐨ ᒥᓯᐍ ᑲᓇᐍᐣᑕᑯᓱᐏᓂᓂ ᐁᑿ ᑫᒋᓇᐨ ᐁᑲ ᑫᑯᐣ ᑲᐃᔑᓇᑿᐠ ᐃᐍ ᒥᑲᓱᐏᐣ ᐁᑿ ᒪᓂᑐᑕᑫᐏᐣ ᒋᐏᒋ ᐃᓯᓭᐘᐨ᙮

ᒪᓯᓇᐦᐃᑫᐏᐣ 23

ᐊᓂᔑᓂᓂᐘᐠ ᒥᓂᑯᓯᐘᐠ ᒋᐅᓀᐣᑕᒧᐘᐨ ᐁᑿ ᒋᐘᐍᓇᐦᑐᐘᐨ ᐅᓂᑲᓀᐣᑕᒧᐏᓂᐘᐣ ᐁᑿ ᑫᑐᒋᑲᑌᑭᐣ ᐊᐸᒋᑐᐘᒋᐣ ᐅᒥᓂᑯᓱᐏᓂᐘᐣ ᑫᐃᔑᐘᐍᓇᐦᒋᑫᐘᐨ᙮ ᐃᐍ ᒪᔭᒼ, ᐊᓂᔑᓂᓂᐘᐠ ᒥᓂᑯᓯᐘᐠ ᒋᐏᒋᑢᐘᐨ ᐘᐍᓇᐦᒋᑫᐏᓂᐠ ᐁᑿ ᐅᓀᐣᒋᑲᑌᓂᐠ ᒥᓄᔭᐏᓂᐠ, ᐘᑲᐦᐃᑫᐏᓂᐠ ᐁᑿ ᑯᑕᑭᔭᐣ ᑲᐏᒋᔓᓂᔭᑫᓭᓂᐠ ᐊᓄᐦᑭᐏᐱᒧᒋᑫᐏᓇᐣ ᐁᑿ ᐘᐏᒋᐏᑐᐏᓂᐠ ᐱᒧᒋᑫᐏᓇᐣ ᑲᐏᒋᐸᑲᒥᐡᑲᑯᐘᒋᐣ ᐁᑿ, ᐊᓂᑯ ᑫᔭᐦᑯᓭᑵᐣ, ᒋᔭᐸᒋᒋᑲᑌᑭᐣ ᐱᒧᒋᑫᐏᓇᐣ ᐃᒪ ᐏᓇᐘ ᐅᐱᒧᒋᑫᐏᑲᒥᑯᐘᐣ᙮

ᒪᓯᓇᐦᐃᑫᐏᐣ 24

1. ᐊᓂᔑᓂᓂᐘᐠ ᒥᓂᑯᓯᐘᐠ ᐃᐍᓂ ᑲᔭᐡ ᐅᒪᐢᑭᑭᒥᐘᐣ ᐁᑿ ᒋᐱᒥᐸᒥᑐᐘᐨ ᐅᒥᓂᔭᐏᑐᑕᒧᐏᓂᐘᐣ, ᐃᐍᓂ ᑲᔦ ᑲᑲᓇᐍᐣᑕᑿᓂᓂᑭᐣ ᑲᑭᒋᓀᐣᑕᑿᓂᓂᑭᐣ ᒪᐡᑭᑭᐏ ᒪᐡᑯᔑᐣ, ᐊᐏᔭᔑᔕᐣ ᐁᑿ ᐊᐦᑭᐏ ᐊᓯᓂᐣ᙮ ᐊᓂᔑᓂᓂᐘᐠ ᒥᓂᑯᓯᐘᐠ ᒋᑌᐱᓇᒧᐘᐨ, ᐁᑲ ᒋᐏᒋ ᒪᒋᑲᓇᐘᐸᒪᑲᓄᐘᐨ ᐃᐍᓂ ᐅᒋ, ᑲᑭᓇ ᐘᐏᒋᐏᑐᐏᓂᐠ ᐁᑿ ᒥᓄᔭᐏᓂᐠ ᐏᒋᐦᐃᐍᐏᓇᐣ᙮

2. ᐊᓂᔑᓂᓂᐘᐠ ᑕᐱᑕᐅ ᒥᓂᑯᓯᐘᐠ ᒋᒧᒋᑫᐣᑕᒧᐘᐨ ᒪᐘᐨ ᑲᐃᐡᐱ ᑌᐱᓂᑲᓂᐘᐠ ᑲᐃᔑᐘᐍᓇᐦᑌᐠ ᐃᐍ ᒥᔭᐏᐠ ᐁᑿ ᒪᒥᑐᓀᐣᒋᑫᐏᓂᐠ ᒥᓄᔭᐏᓂᐠ᙮ ᐱᐠᓯᔭᐦᑭᐣ ᐅᑯᒪᐏᓇᐣ ᐅᑲᑐᑕᓇᐘ ᑫᐏᒋ ᐘᐸᑕᒧᐘᐨ ᑫᐏᒋ ᐱᒥᑌᐱᓂᑲᓂᐘᐠ ᒥᑐᓂ ᑭᑫᐣᑕᒪᐏᐣ ᐅᐍ ᐅᒋ ᒥᓂᑯᓱᐏᐣ᙮

ᒪᓯᓇᐦᐃᑫᐏᐣ 25

ᐊᓂᔑᓂᓂᐘᐠ ᒥᓂᑯᓯᐘᐠ ᒋᐱᒥᐸᒥᑐᐘᐨ ᐁᑿ ᒋᒪᐡᑲᐏᑐᐘᐨ ᑲᒪᔭᑭᓇᑿᓂᓂᐠ ᐅᑕᐦᒐᑯ ᐏᒋᐏᑐᐏᓂᐘᐣ ᐃᐍᓂ ᑲᔭᐡ ᑲᑭᑎᐯᐣᑕᒧᐘᒋᐣ ᓇᐣᑕ ᑲᑭ ᐊᐱᑕᒧᐘᒋᐣ ᐁᑿ ᑲᑭ ᐊᐸᒋᑐᐘᒋᐣ ᐊᐦᑭᐣ, ᑕᔑᑫᐏᓇᐣ, ᓂᐱᐣ ᐁᑿ ᓇᓀᐅ ᑭᒋᑲᒥᐣ ᐁᑿ ᑯᑕᑭᔭᐣ ᐊᐸᒋᒋᑲᓇᐣ ᐁᑿ ᒋᐸᒥᐦᑐᐘᐨ ᐅᑲᓇᐘᐸᒥᑯᓯᐘᐣ ᐃᐍᑎ ᐊᐦᐱᐣ ᓂᑲᓂᐠ ᐱᒪᑎᓱᐏᓂᓂ ᐅᐍᓂ ᐅᒋ᙮

ᒪᓯᓇᐦᐃᑫᐏᐣ 26

1. ᐊᓂᔑᓂᓂᐘᐠ ᒥᓂᑯᓯᐘᐠ ᐊᐦᑭᐣ, ᑕᔑᑫᐏᓇᐣ ᐁᑿ ᐊᐸᒋᒋᑲᓇᐣ ᑲᔭᐡ ᑲᑭᑎᐯᐣᑕᒧᐘᐸᐣ, ᑲᑭ ᐊᐱᑕᒧᐘᐸᐣ ᓇᐣᑕ ᑲᑭ ᐊᐸᒋᑐᐘᐸᐣ ᓇᐣᑕ ᑲᑭ ᐊᓂᑌᐱᐣᑕᒧᐘᐨ᙮

2. ᐊᓂᔑᓂᓂᐘᐠ ᒥᓂᑯᓯᐘᐠ ᒋᑎᐯᐣᑕᒧᐘᐨ, ᒋᔭᐸᒋᑐᐘᐨ, ᒋᐘᐍᓇᐦᑐᐘᐨ ᐁᑿ ᒋᐱᒧᑐᐘᐨ ᐊᐦᑭᐣ, ᑕᔑᑫᐏᓇᐣ ᐁᑿ ᐊᐸᒋᒋᑲᓇᐣ ᑲᑎᐯᐣᑕᒧᐘᐨ ᐃᒪ ᐅᒋ ᑲᔭᐡ ᑎᐯᐣᒋᑫᐏᓂᐠ ᓇᐣᑕ ᑯᑕᑭᐠ ᑲᔭᐡ ᑲᑭ ᐊᐱᑕᒧᐘᐸᐣ ᓇᐣᑕ ᑲᑭ ᐊᐸᒋᑐᐘᐸᐣ, ᐃᐍᓂ ᑲᔦ ᐊᐦᐱᐣ ᑲᑭ ᐊᓂ ᑌᐱᓇᒧᐘᒋᐣ ᒋᑎᐯᐣᑕᒧᐘᐨ᙮

3. ᐱᐠᓯᔭᐦᑭᐣ ᐅᑯᒪᐏᓇᐣ ᑕᒥᑵᐘᐠ ᐅᓇᑯᓂᑫᐏ ᓂᐦᐢᑕᐏᓇᑫᐏᓂᐠ ᐁᑿ ᑲᓇᐍᐣᒋᑫᐏᓂᐠ ᐃᑵᓂᐘᐣ ᐅᒋ ᐊᐦᑭᐣ, ᑕᔑᑫᐏᓇᐣ ᐁᑿ ᐊᐸᒋᒋᑲᓇᐣ᙮ ᐃᐍ ᓂᐦᐢᑕᐏᓂᑫᐏᐣ ᑕᑭᑐᒋᑲᑌ ᒋᐏᒋ ᑲᓇᑌᐣᒋᑲᑌᑭᐣ ᐅᑎᔑᐱᒪᑎᓱᐏᓂᐘᐣ, ᑲᔭᐡ ᐅᑐᑕᒧᐏᓂᐘᐣ ᐁᑿ ᐅᑕᐦᑭᐏ ᑎᐯᐣᒋᑫᐏᓂᐘᐣ ᐱᒧᒋᑫᐏᓇᐣ ᐃᑵᓂᐘᐠ ᐊᓂᔑᓂᓂᐘᐠ᙮

ᒪᓯᓇᐦᐃᑫᐏᐣ 27

ᐱᐠᓯᔭᐦᑭᐣ ᐅᑯᒪᐏᓇᐣ ᐅᑲᐘᐍᓇᐦᑐᓇᐘ ᐁᑿ ᐅᑲᔭᓄᐦᑭᓭᑐᓇᐘ, ᑲᑭᐏᒋᑢᓂᐨ ᐊᓂᔑᓂᓂᐘᐣ, ᑕᐱᑕᐏᓂᑫᐏᓂᐠ, ᐯᔑᑯᑲᐸᐏᓂᐠ, ᐁᑲ ᐊᐏᔭ ᒋᐸᑲᓂᑐᑕᐘᑲᓄᐨ, ᒋᑕᐘᐠ ᐁᑿ ᒋᓇᑿᐠ ᐃᔑᐱᒧᒋᑫᐏᐣ, ᒋᓂᐦᐢᑕᐏᓂᑲᑌᓂᑭᐣ ᐊᓂᔑᓂᓂᐘᐠ ᐅᑐᓇᑯᓂᑫᐏᓂᐘᐣ, ᑲᔭᐡ ᐅᑐᑕᒧᐏᓂᐘᐣ, ᐅᑎᔑᐱᒪᑎᓱᐏᓂᐘᐣ ᐁᑿ ᐅᑕᐦᑭᐏ ᐱᒧᒋᑫᐏᓂᐘᐣ, ᒋᓂᐦᐢᑕᐏᓂᑲᑌᓂᑭᐣ ᐁᑿ ᒋᐏᓀᐣᒋᑲᑌᑭᐠ ᐊᓂᔑᓂᓂᐘᐠ ᑲᐃᔑ ᑎᐯᐣᑕᒧᐘᐨ ᐅᑕᐦᑭᒥᐘᐣ, ᐅᑕᔑᑫᐏᓂᐘᐣ ᐁᑿ ᐅᑕᐸᒋᒋᑲᓂᐘᐣ, ᐃᑵᓂᐘᐣ ᑲᔦ ᑲᔭᐡ ᑲᑭᑎᐯᐣᑕᒧᐘᐸᐣ ᓇᐣᑕ ᑲᑭ ᐊᐱᑕᒧᐘᐸᐣ ᓇᐣᑕ ᑲᑭ ᐊᐸᒋᑐᐘᐸᐣ᙮ ᐊᓂᔑᓂᓂᐘᐠ ᒥᓂᑯᓯᐘᐠ ᒋᐏᒋᑢᐘᐨ ᐅᒪ ᐱᒧᒋᑫᐏᓂᐠ᙮

ᒪᓯᓇᐦᐃᑫᐏᐣ 28

1. ᐊᓂᔑᓂᓂᐘᐠ ᒥᓂᑯᓯᐘᐠ ᒋᓇᐱᐘᐍᐡᑐᐘᐨ, ᑐᑲᐣ ᓇᐸᒋᑫᐏᓂᐠ ᓇᐣᑕ, ᑭᐡᐱᐣ ᐁᑲ ᐅᐍ ᐃᓯᓭᑵᐣ, ᑌᐻᐏᓇᐠ, ᑕᐱᑕᐏᓂᑫᐏᓂᐠ ᐁᑿ ᒋᓇᐱᓭᐠ ᒥᓂᑯᐠ ᐃᐍ ᑎᐸᐦᐃᑫᐏᐣ, ᐃᑵᓂᐘᐣ ᐅᒋ ᐊᐦᑭᐣ, ᑕᔑᑫᐏᐧᓇᐣ ᐁᑿ ᐊᐸᒋᒋᑲᓇᐣ ᑲᔭᐡ ᑲᑭᐱ ᑎᐯᐣᑕᒧᐘᐸᐣ ᓇᐣᑕ ᑲᑭᑕᓇᐱᐘᐸᐣ ᓇᐣᑕ ᑲᑭᐱ ᐊᐸᒋᑐᐘᐸᐣ, ᐁᑿ ᐁᑭᐏᒋ ᒪᑲᒪᑲᓄᐘᒋᐣ, ᐁᐏᑕᐱᓂᑲᑌᓂᑭᐣ, ᐁᑭ ᐊᐱᒋᑲᑌᓂᑭᐣ, ᐁᑭ ᐊᐸᒋᒋᑲᑌᓂᑭᐣ ᓇᐣᑕ ᐁᑭ ᓂᔑᐘᓇᒋᒋᑲᑌᓂᑭᐣ ᐁᑲ ᐅᐸᐣᐢᑵᓱᐏᓂᐘᐠ ᐁᑭᐏᒋᒥᑵᐘᐨ, ᒷᔦ ᐁᑿ ᐏᑕᒪᑫᐏᓂᐠ ᐁᑭᐏᒋᐸᑭᑎᓇᒧᐘᒋᐣ᙮

2. ᑭᐡᐱᐣ ᐁᐦᑕ ᐅᐸᐣᐢᑵᓱᐏᓂᐘᐠ ᑲᑭᔑ ᑌᐻᑕᒧᐘᑵᐣ ᐊᐏᔭᐠ ᑲᐸᑲᒥᐡᑲᑯᐘᒋᐣ ᐃᐍᓂ, ᑕᑎᐦᐊᐦᐃᑲᑫᓇᓂᐘᐣ ᐊᐦᑭᐣ ᒋᔭᐸᑕᑭᐣ, ᑕᔑᑫᐏᓇᐣ ᐁᑿ ᐊᐸᒋᒋᑲᓇᐣ ᒋᑕᐱᑕᐏᓂᑲᑌᑭᐣ ᑲᔭᐱᒋᒥᓄᐘᔑᑭᐣ, ᑲᔭᐱᒐᑭᐣ ᐁᑿ ᐅᓇᐠ ᐅᓂᑫᐏᓂᐠ ᐃᓯᓭᐏᓂᐠ ᓇᐣᑕ ᔓᓂᔭᐏ ᑎᐸᐦᐃᑫᐏᐣ ᓇᐣᑕ ᑯᑕᑭᐠ ᑫᐃᔑ ᒥᓄᓭᐠ ᓇᐱᐏᓇᐦᒋᑫᐏᐣ᙮

ᒪᓯᓇᐦᐃᑫᐏᐣ 29

1. ᐊᓂᔑᓂᓂᐘᐠ ᒥᓂᑯᓯᐘᐠ ᐊᐦᑭᐏ ᑲᓇᐍᐣᒋᑫᐏᓂᐠ ᐃᒪ ᐱᐘᒋᔭᐦᐃᐠ ᐁᑿ ᑫᐃᔑ ᑌᐱᐊᓄᐦᑭᓭᓂᐠ ᐃᒪ ᐅᑕᐦᑭᒥᐘᐠ ᓇᐣᑕ ᐅᑕᔑᑫᐏᓂᐘᐠ ᐁᑿ ᐅᑕᐸᒋᒋᑲᓂᐘᐠ᙮ ᐱᐠᓯᔭᐦᑭᐣ ᐅᑯᒪᐏᓇᐣ ᐅᑲᐘᐍᓇᐦᑐᓇᐘ ᐁᑿ ᐅᑲᐊᓄᐦᑭᓭᑐᓇᐘ ᐏᒋᐦᐃᐍᐏᐣ ᐱᒧᒋᑫᐏᓇᐣ ᐃᑵᓂᐘᐠ ᐅᒋ ᐊᓂᔑᓂᓂᐘᐠ ᐃᒪ ᐊᐦᑭᐏ ᑲᓇᐍᐣᒋᑵᐏᓂᐠ, ᐁᑲ ᒋᐤᒋ ᒪᒉᓂᒪᑲᓄᐘᒋᐣ ᐃᐍᓂ ᐅᒋ᙮

2. ᐱᐠᓯᔭᐦᑭᐣ ᐅᑯᒪᐏᓇᐣ ᑫᐃᔑ ᒥᓄᓭᓂᐠ ᑫᑯᓇᐣ ᐅᑲᑐᑕᓇᐘ ᑫᒋᓇᐨ ᐁᑲ ᑲᓇᐍᐣᒋᑫᐏᓇᐣ ᓇᐣᑕ ᐍᐱᓂᑫᐏᓇᐣ ᑲᑯᑕᑎᑿᑭᐣ ᒋᑕᔑ ᐃᓯᓭᐠ ᐃᒪ ᐅᑕᐦᑭᒥᐘᐠ ᓇᐣᑕ ᐅᑕᔑᑫᐏᓂᐘᐠ ᐊᓂᔑᓂᓂᐘᐠ ᐁᑲ ᐅᐸᐣᐢᑵᓱᐏᓂᐘᐠ, ᒷᔦ ᐁᑿ ᐏᑕᒪᑫᐏᓂᐠ ᑲᑭᐏᒋ ᐸᑭᑎᓇᒧᐘᐨ ᐃᐍᓂ ᒋᑐᒋᑲᑌᓂᐠ ᐃᒪ᙮

3. ᐱᐠᓯᔭᐦᑭᐣ ᐅᑯᒪᐏᓇᐣ ᑫᐃᔑ ᒥᓄᓭᓂᐠ ᐅᑲᑐᑕᓇᐘ ᑫᐏᒋ ᑫᒋᓇᓭᓂᐠ, ᑲᐃᔑ ᓇᑕᐍᐣᑕᑿᓂᓂᐠ, ᐱᒧᒋᑫᐏᓇᐣ ᑫᐏᒋ ᓇᓇᑲᑕᐘᐸᒪᑲᓄᐘᐨ, ᐱᒥᐸᒥᐦᐊᑲᓄᐘᐨ ᐁᑿ ᓇᐸᐦᓴᑲᓄᐘᐨ ᑲᒥᓄᔭᐘᐨ ᐊᓂᔑᓂᓂᐘᐠ, ᑲᐃᔑ ᐘᐍᓇᐦᒋᑲᑌᐠ ᐁᑿ ᑲᐃᔑ ᐊᓄᐦᑭᓭᒋᑲᑌᐠ ᐃᑵᓂᐘᐣ ᐅᒋ ᐊᐏᔭᐠ ᑲᐸᑲᒥᐡᑲᑯᐘᐨ ᐃᑵᓂᐘᐣ ᑫᑯᓇᐣ, ᐊᒥ ᐁᐃᔑ ᐊᓄᐦᑭᓭᒋᑲᑌᑭᐣ᙮

ᒪᓯᓇᐦᐃᑫᐏᐣ 30

1. ᑲᐏᐣ ᑕᑐᒋᑲᑌᐘᐣ ᓄᑎᓂᑫᐏ ᑐᑕᒧᐏᓇᐣ ᐃᒪ ᐅᑕᐦᑭᒥᐘᐠ ᓇᐣᑕ ᐅᑕᔑᑫᐏᓂᐘᐠ ᐊᓂᔑᓂᓂᐘᐠ, ᑭᐡᐱᐣ ᐁᐦᑕ ᐁᐃᓯᓭᐠ ᒋᑐᒋᑲᑌᐠ ᑲᑭᓇ ᐊᐏᔭᐠ ᑲᐃᔑᓇᑕᐍᐣᑕᒧᐘᐨ ᓇᐣᑕ ᐸᐣᐢᑵᓱᐏᓂᐠ ᑲᑭᔑᑌᐻᒋᑲᑌᐠ ᓇᐣᑕ ᑲᐃᔑᓇᑐᑕᒪᐘᐨ ᐊᓂᔑᓂᓂᐘᐠ ᒋᑐᒋᑲᑌᓂᐠ᙮

2. ᐱᐠᓯᔭᐦᑭᐣ ᐅᑯᒪᐏᓇᐣ ᐅᑲᐱᒧᑐᓇᐘ ᑲᒥᓄᓭᓂᑭᐣ ᑕᔑᑕᒪᑐᐏᓇᐣ ᐃᑵᓂᐘᐣ ᐅᒋ ᐊᓂᔑᓂᓂᐘᐠ ᐅᑎᔑᓭᐏᓂᐘᐣ, ᐃᒪ ᒪᔭᒼ ᑲᐃᔑᐱᒥᓭᓂᐠ ᐁᑿ ᐃᒪ ᑲᐃᔑ ᓂᐸᐏᑕᒧᐘᒋᐣ ᐅᐱᒧᒋᑫᐏᑲᒥᑯᐘᐣ, ᒷᔦ ᐊᐸᒋᒋᑲᑌᓂᑭᐣ ᐅᑕᐦᑭᒥᐘᐣ ᓇᐣᑕ ᐅᑕᔑᑫᐏᓂᐘᐣ ᐃᐍᓂ ᐅᒋ ᓄᑎᓂᑫᐏ ᑐᑕᒧᐏᓇᐣ᙮

ᒪᓯᓇᐦᐃᑫᐏᐣ 31

1. ᐊᓂᔑᓂᓂᐘᐠ ᒥᓂᑯᓯᐘᐠ ᒋᐱᒥᐸᒥᑐᐘᐨ, ᒋᑎᐯᐣᑕᒧᐘᐨ, ᒋᑲᓇᐍᐣᑕᓇᒧᐘᐨ ᐁᑿ ᒋᐘᐍᓇᐦᑐᐘᐨ ᐅᑎᔑᐱᒪᑎᓱᐏᓂᐘᐣ, ᑲᔭᐡ ᐅᑭᑫᐣᑕᒪᐏᓂᐘᐣ ᐁᑿ ᑲᔭᐡ ᐅᑎᔑᐱᒪᑎᓱᐏᓂᐘᐣ ᑲᐃᔑᓇᑯᑐᐘᒋᐣ, ᐃᐍᓂ ᑲᔦ ᑲᔭᓄᒋ ᓇᑿᓂᓂᑭᐣ ᓇᓇᑲᑕᐘᐸᒋᑫᐏᓇᐣ, ᐊᐸᒋᒋᑲᓇᐣ ᐁᑿ ᐃᔑᐱᒪᑎᓱᐏᓇᐣ, ᐃᑵᓂᐘᐣ ᑲᔦ ᐊᐏᔭᐠ ᐁᑿ ᑲᔭᓄᐦᑯᓭᑭᐣ ᐊᐸᒋᒋᑲᓇᐣ, ᓂᐦᑕᐏᑯᒋᑫᐏᓇᐣ, ᒪᐡᑭᑭᐣ, ᑭᑫᐣᑕᒪᐏᓇᐣ ᐃᑵᓂᐘᐣ ᑲᔭᑭᐣ ᐃᒪ ᐊᐏᔭᔑᔕᐠ ᐁᑿ ᑫᑯᓇᐣ ᑲᓂᐦᑕᐏᑿᑭᐣ, ᑲᔭᐡ ᐊᔭᒧᐏᓂᐠ ᑐᑕᒧᐏᓇᐣ, ᒪᓯᓇᐦᐃᑫᐏᓇᐣ, ᒪᓯᓇᐏᒋᑫᐏᓇᐣ, ᒣᑕᐍᐏᑲᑵᒋᐏᓇᐣ ᐁᑿ ᑲᔭᐡ ᒣᑕᐍᐏᓇᐣ ᐁᑿ ᐅᔑᐱᐦᐃᑫᐏᓇᐣ ᐁᑿ ᑲᑭᑕᐏᑐᑕᒧᐏᓇᐣ᙮ ᒥᓂᑯᓯᐘᐠ ᒋᐱᒥᐸᒥᑐᐘᐨ, ᒋᑎᐯᐣᑕᒧᐘᐨ, ᒋᑲᓇᐍᐣᑕᓇᒧᐘᐨ ᐁᑿ ᒋᐘᐍᓇᐦᑐᐘᐨ ᐅᑭᑫᐣᑕᒪᐏᓂᐘᐣ ᐃᑵᓂᐘᐣ ᑐᑲᐣ ᑲᔭᐡ ᐅᑎᔑᐱᒪᑎᓱᐏᓂᐘᐣ, ᑲᔭᐡ ᐅᑭᑫᐣᑕᒪᐏᓂᐘᐣ, ᐁᑿ ᑲᔭᐡ ᐅᑎᔑᐱᒪᑎᓱᐏᓂᐘᐣ ᑲᐃᔑᓇᑯᑐᐘᒋᐣ᙮

2. ᐃᑵᓂᐘᐠ ᑲᔦ ᐊᓂᔑᓂᓂᐘᐠ, ᐱᐠᓯᔭᐦᑭᐣ ᐅᑯᒪᐏᓇᐣ ᑲᒥᓄᓭᓂᑭᐣ ᑐᑕᒧᐏᓇᐣ ᐅᑲᑐᑕᓇᐘ ᑫᐏᒋ ᓂᐦᐢᑕᐏᓂᑲᑌᓂᑭᐣ ᐁᑿ ᑫᐏᒋ ᑲᓇᐍᐣᑕᑿᓂᓂᑭᐣ ᐊᐸᒋᑐᐘᒋᐣ ᐅᒥᓂᑯᓱᐏᓂᐘᐣ᙮

ᒪᓯᓇᐦᐃᑫᐏᐣ 32

1. ᐊᓂᔑᓂᓂᐘᐠ ᒥᓂᑯᓯᐘᐠ ᒋᐏᓀᐣᑕᒧᐘᐨ ᐁᑿ ᒋᐘᐍᓇᐦᑐᐘᐨ ᑲᐃᔑᓂᑲᓀᐣᑕᒧᐘᐨ ᐁᑿ ᑫᑐᒋᑲᑌᑭᐣ ᐃᑵᓂᐘᐣ ᐘᐍᓇᐦᒋᑫᐏᓇᐣ ᓇᐣᑕ ᑫᐃᔑ ᐊᐸᑕᑭᐣ ᐅᑕᐦᑭᒥᐘᐣ ᓇᐣᑕ ᐅᑕᔑᑫᐏᓂᐘᐣ ᐁᑿ ᑯᑕᑭᔭᐣ ᐊᐸᒋᒋᑲᓇᐣ᙮

2. ᐱᐠᓯᔭᐦᑭᐣ ᐅᑯᒪᐏᓇᐣ ᐅᑲᑕᔑᑕᒷᐘᐣ ᐁᑿ ᐅᑲᐏᒋᐦᐊᐘᐣ ᑌᐻᐏᓇᐠ ᐃᑵᓂᐘᐣ ᐊᓂᔑᓂᓂᐘᐣ ᐅᑎᓯᓭᐏᓂᐘᐠ ᐃᒪ ᐅᒋ ᑲᐃᔑ ᐏᒋᑲᐸᐏᑕᒧᐘᒋᐣ ᐅᐱᒧᒋᑫᐏᓂᑲᒥᑯᐘᐣ ᑫᐏᒋ ᑌᐱᓇᒧᐘᐨ ᐅᐸᐣᐢᑵᓱᐏᓂᐘᐣ ᐁᑿ ᐏᑕᒪᑫᐏᓂᐠ ᐅᐸᑭᑎᐣᑎᓱᐏᓂᐘᐣ ᐃᐍᓂ ᒋᑐᒋᑲᑌᓂᐠ ᐱᒧᒋᑫᐏᓂᓂ ᑫᐏᒋ ᐸᑲᒥᐡᑲᑯᐘᐨ ᐃᒪ ᐅᑕᐦᑭᒥᐘᐠ ᓇᐣᑕ ᐅᑕᔑᑫᐏᓂᐘᐠ ᐁᑿ ᑯᑕᑭᔭᐣ ᐅᑕᐸᒋᒋᑲᓂᐘᐠ, ᐃᐍ ᒪᔭᒼ ᑐᑲᐣ ᐘᐍᓇᐦᒋᑫᐏᓂᐠ, ᑲᔭᐸᒋᒋᑲᑌᓂᑭᐣ ᓇᐣᑕ ᑲᐏᑕᐱᓇᑲᓄᓂᐨ ᐱᑿᒋᔭᐦᐃᐠ ᐊᓯᓂᐣ, ᓂᐱᓂ ᓇᐣᑕ ᑯᑕᑭᔭᐣ ᐊᐦᑭᐏ ᐊᐸᒋᒋᑲᓇᐣ᙮

3. ᐱᐠᓯᔭᐦᑭᐣ ᐅᑯᒪᐏᓇᐣ ᐅᑲᑿᔭᑎᓇᓇᐘ ᑫᒥᓄᓭᓂᑭᐣ ᐱᒧᒋᑫᐏᓇᐣ ᑌᐻᓇᐠ ᐁᑿ ᑕᐱᑕᐏᓇᐠ ᑫᐏᒋ ᓇᐱᐘᐍᐡᒋᑲᑌᑭᐣ ᑫᑯᓇᐣ ᑐᑕᒧᐏᓇᐣ, ᐁᑿ ᒪᔭᒼ ᑿᔭᐠ ᐏᓇᐦᒋᑫᐏᓇᐣ ᑕᑐᒋᑲᑌᐘᐣ ᑫᐏᒋ ᒪᒥᓄᓂᑲᑌᑭᐣ ᑲᐃᔑ ᐊᔭᒋᓭᑭᐣ ᑫᑯᓇᐣ ᐃᒪ ᐱᑿᒋᔭᐦᐃᐠ, ᑲᔓᓂᔭᑫᒪᑲᑭᐣ ᐊᓄᐦᑭᐏᐱᒧᒋᑫᐏᓂᐠ, ᐘᐏᒋᐏᑐᐏᓂᐠ, ᐅᑎᔑᐱᒪᑎᓱᐏᓂᐘᐣ ᓇᐣᑕ ᐊᐦᒐᑯ ᐸᑲᒥᐡᑲᑫᐏᓂᐠ᙮

ᒪᓯᓇᐦᐃᑫᐏᐣ 33

1. ᐊᓂᔑᓂᓂᐘᐠ ᒥᓂᑯᓯᐘᐠ ᒋᐏᓀᐣᑕᒧᐘᐨ ᑫᐃᔑᐘᐸᒪᑲᓄᐘᐨ ᓇᐣᑕ ᑲᐏᒋᑎᐯᐣᑕᑯᓯᐘᐨ ᑲᐃᔑᓇᐱᓭᓂᐠ ᐅᑎᔑᐱᒪᑎᓱᐏᓂᐘᐣ ᐁᑿ ᑲᔭᐡ ᐅᑐᑕᒧᐏᓂᐘᐣ᙮ ᑲᐏᐣ ᐅᐍ ᑕᐏᒋ ᒪᒋᓭᓯᓄᐣ ᐃᐍ ᐅᒥᓂᑯᓱᐏᓂᐘᐣ ᐊᓂᔑᓂᓂᐘᐠ ᒋᑌᐱᓇᒧᐘᐨ ᒋᐏᒋᑎᐯᐣᑕᑯᓯᐘᐨ ᐃᒪ ᐱᐠᓯᔭᐦᑭᐠ ᑲᑕᔑᐱᒪᑎᓯᐘᐨ᙮

2. ᐊᓂᔑᓂᓂᐘᐠ ᒥᓂᑯᓯᐘᐠ ᒋᐏᓀᐣᑕᒧᐘᐨ ᐏᓇᐦᒋᑫᐃᓇᐣ ᐁᑿ ᒋᐅᓂᓇᐘᐨ ᐊᐘᓀᓇᐣ ᑫᐏᒋᑢᓂᐨ ᐃᒪ ᐅᐱᒧᒋᑫᐃᑲᒥᑯᐘᐣ ᑲᐃᔑᓇᐱᓭᓂᑭᐣ ᑲᐃᔑᐱᒧᒋᑫᐘᐨ᙮

ᒪᓯᓇᐦᐃᑫᐏᐣ 34

ᐊᓂᔑᓂᓂᐘᐠ ᒥᓂᑯᓯᐘᐠ ᒋᓇᑯᑐᐘᐨ, ᒋᐘᐍᓇᐦᑐᐘᐨ ᐁᑿ ᒋᐱᒥᐸᒥᑐᐘᐨ ᐅᐱᒧᒋᑫᐏᑲᒥᑯᐘᐣ ᑲᐃᔑᐘᐍᓇᐦᑌᓂᑭᐣ ᐁᑿ ᑲᐃᔑᒪᔭᑭᓇᑿᓂᓂᑭᐣ ᐅᑎᔑᐱᒪᑎᓱᐏᓂᐘᐣ, ᐅᑕᐦᒐᑯᐱᒪᑎᓱᐏᓂᐘᐣ, ᑲᔭᐡ ᐅᑐᑕᒧᐏᓂᐘᐣ, ᐅᑎᔑᐱᒥᓭᐏᓂᐘᐣ, ᐅᑐᑕᒧᐏᓂᐘᐣ ᐁᑿ, ᐃᒪ ᑲᐃᔑ ᐃᓯᓭᓂᐠ, ᐅᑐᓇᑯᓂᑫᐏ ᐱᒧᒋᑫᐏᓂᐘᐣ ᓇᐣᑕ ᐅᑎᔑᐱᒪᑎᓱᐏᓂᐘᐣ, ᑲᐃᔑᓇᐱᓭᓂᐠ ᐃᐍᓂ ᒥᓯᐍ ᐊᐦᑭᐠ ᐊᐏᔭᐠ ᐅᒥᓂᑯᓱᐏᓂᐘᐣ ᑲᐃᔑ ᐅᓇᐦᑌᓂᐠ᙮

ᒪᓯᓇᐦᐃᑫᐏᐣ 35

ᐊᓂᔑᓂᓂᐘᐠ ᒥᓂᑯᓯᐘᐠ ᒋᐏᓀᐣᑕᒧᐘᐨ ᐅᑲᓇᐘᐸᒥᑯᓱᐏᓂᐘᐣ ᐊᐏᔭᐠ ᐃᒪ ᐅᑕᔑᑫᐏᓂᐘᐠ᙮

ᒪᓯᓇᐦᐃᑫᐏᐣ 36

1. ᐊᓂᔑᓂᓂᐘᐠ, ᐃᑵᓂᐘᐠ ᒪᔭᒼ ᑲᐏᒋ ᓂᑲᑌᓇᑲᓄᐘᐨ ᐃᒪ ᐅᒋ ᒥᓯᐍ ᐊᐦᑭᐠ ᐸᑲᐣ ᐊᐦᑭ ᑭᑭᓇᐘᒋᒋᑫᐏᓂᐠ, ᒥᓂᑯᓯᐘᐠ ᒋᐱᒥᐸᒥᑐᐘᐨ ᐁᑿ ᒋᐘᐍᓇᐦᑐᐘᐨ ᑌᐱᓂᐍᐏᓇᐣ, ᐘᑯᒥᑐᐏᓇᐣ ᐁᑿ ᐏᒋᐦᐃᑐᐏᓇᐣ, ᐃᐍ ᑲᔦ ᐊᐦᒐᑯ ᑐᑕᒧᐏᓇᐣ, ᐅᑎᔑᐱᒪᑎᓱᐏᓂᐘᐣ, ᐅᑐᑯᒪᐏᓂᐘᐣ, ᑲᔓᓂᔭᑫᒪᑲᓂᓂᑭᐣ ᐊᓄᐦᑭᐏᐱᒧᒋᑫᐏᓇᐣ ᐁᑿ ᐘᐏᒋᐏᑐᐏᓇᐣ ᑲᐏᒋᑐᒋᑲᑌᑭᐣ, ᐃᑵᓂᐘᐣ ᐅᐏᒋ ᐊᓂᔑᓂᓂᒧᐘᐣ ᐁᑿ ᑲᔦ ᑯᑕᑭᔭᐣ ᐃᒪ ᐊᔓᑲᒥᔭᐦᑭᐠ᙮

2. ᐱᐠᓯᔭᐦᑭᐣ ᐅᑯᒪᐏᓇᐣ, ᑕᔑᑕᒪᑐᐏᓂᐠ ᐁᑿ ᐏᒋᐦᐃᑐᐏᓂᐠ ᐃᑵᓂᐘᐣ ᐅᒋ ᐊᓂᔑᓂᓂᐘᐣ, ᑲᐃᔑᒥᓄᓭᓂᐠ ᐅᑲᑐᑕᓇᐘ ᑫᐏᒋ ᐊᐸᒋᒋᑲᑌᓂᑭᐣ ᐁᑿ ᒋᑫᒋᓇᐦᐅᒋᑲᑌᑭᐣ ᑲᐃᔑ ᓇᐅᐦᑭᓭᒋᑲᑌᑭᐣ ᐃᑵᓂᐘᐣ ᒥᓂᑯᓯᐘᐠ

ᒪᓯᓇᐦᐃᑫᐏᐣ 37

1. ᐊᓂᔑᓂᓂᐘᐠ ᒥᓂᑯᓯᐘᐠ ᒋᓂᐦᐢᑕᐏᓂᑲᑌᓂᑭᐣ, ᒋᐘᐸᒋᑲᑌᓂᑭᐣ ᐁᑿ ᒋᔑᒪᑲᓂᔑᑲᒋᑲᑌᓂᑭᐣ ᐅᑯᒪᐏᓇᐣ ᓇᑯᑕᒪᑫᐏᓇᐣ, ᑌᐻᑕᒪᑫᐏᓇᐣ ᐁᑿ ᑯᑕᑭᔭᐣ ᒪᐡᑲᐏ ᐘᐍᓇᐦᒋᑫᑕᒪᑫᐏᓇᐣ ᑲᐃᔑᑭᔑᒋᑲᑌᑭᐣ ᐃᒪ ᐱᐠᓯᔭᐦᑭᐣ ᓇᐣᑕ ᐅᑐᐱᒧᒋᐁᑕᒪᑯᐘᐣ ᐱᐠᓯᔭᐦᑭᐣ ᑫᐏᒋ ᑭᒋᓀᐣᑕᒧᐘᒋᐣ ᐁᑿ ᑲᓇᑌᐣᑕᒧᐘᒋᐣ ᐃᑵᓂᐘᐣ ᐅᑯᒪᐏᓇᐣ ᓇᑯᑕᒪᑫᐏᓇᐣ, ᑌᐻᑕᒪᑫᐏᓇᐣ ᐁᑿ ᑯᑕᑭᔭᐣ ᒪᐡᑲᐏ ᐘᐍᓇᐦᒋᑫᑕᒪᑫᐏᓇᐣ᙮

2. ᑲᐏᐣ ᑫᑯᐣ ᐅᒪ ᑭᒋ ᐃᑭᑐᐏᐣ ᑕᑭᐏᒋ ᐃᓂᐍᒋᑲᑌᓯᓄᐣ ᐁᐏᒋ ᐊᒍᓂᑲᑌᑭᐣ ᓇᐣᑕ ᐁᓂᑲᑌᓂᑲᑌᑭᐣ ᐅᒥᓂᑯᓱᐏᓂᐘᐣ ᐊᓂᔑᓂᓂᐘᐠ ᐃᒪ ᐅᑯᒪᐏᓇᐣ ᓇᐦᑯᑕᒪᐏᓇᐣ, ᑌᐻᑕᑐᐏᓇᐣ ᐁᑿ ᑯᑕᑭᔭᐣ ᑲᒪᐡᑲᐏᐘᐍᓇᐦᑕᒪᑎᓇᓂᐘᐠ ᐃᒪ ᐸᐱᐠᓯᔭᐦᑭᐠ ᐅᑯᒪᐏᓇᐣ᙮

ᒪᓯᓇᐦᐃᑫᐏᐣ 38

ᐱᐠᓯᔭᐦᑭᐣ ᐅᑯᒪᐏᓇᐣ ᐅᑲᑕᔑᑕᒷᐘᐣ ᐁᑿ ᐅᑲᐏᒋᐦᐊᐘᐣ ᐊᓂᔑᓂᓂᐘᐣ, ᐸᔭᑕᐠ ᐅᑲᑐᑕᓇᐘ, ᐃᐍᓂ ᑲᔦ ᐅᓇᑯᓂᑫᐏᓂᐠ ᑐᑕᒧᐏᓇᐣ, ᑫᐏᒋ ᑌᐱᓇᒧᐘᐨ ᐃᐍᓂ ᑭᒋ ᐃᑭᑐᐏᓂᓂ᙮

ᒪᓯᓇᐦᐃᑫᐏᐣ 39

ᐊᓂᔑᓂᓂᐘᐠ ᒥᓂᑯᓯᐘᐠ ᒋᑌᐱᓇᒧᐘᐨ ᔓᓂᔭᐏᓇᐠ ᐁᑿ ᐃᔑᐱᒥᓭᐏᓂᐠ ᐏᒋᐦᐃᐍᐏᓂᓂ ᐃᒪ ᐱᐠᓯᔭᐦᑭᐠ ᐁᑿ ᐃᒪ ᒥᓯᐍ ᐊᐦᑭᐠ ᐏᒋᐦᐃᐍᐏᓂᐠ, ᒋᒥᓄᐊᐸᒋᑐᐘᐨ ᐅᒥᓂᑯᓱᐏᓂᐘᐣ ᑲᐃᔑ ᐅᔑᐱᐦᐃᑲᑌᓂᑭᐣ ᐃᒪ ᑭᒋ ᐃᑭᑐᐏᓂᐠ᙮

ᒪᓯᓇᐦᐃᑫᐏᐣ 40

ᐊᓂᔑᓂᓂᐘᐠ ᒥᓂᑯᓯᐘᐠ ᒋᑌᐱᓇᒧᐘᐨ ᐁᑿ ᐏᐸᐨ ᐅᓀᐣᒋᑫᐏᓂᓂ ᐃᒪ ᑌᐻᓇᐠ ᐁᑿ ᑕᐱᑕᐅ ᑐᑕᒧᐏᓇᐣ ᐃᐍ ᐅᒋ ᑲᒪᒥᓄᓂᑲᑌᑭᐣ ᒪᒋᓭᐏᓇᐣ ᐁᑿ ᐁᑲ ᑲᑌᐻᑕᑎᓇᓂᐘᐠ ᐃᑵᓂᐘᐠ ᐅᒋ ᐸᐸᑲᐣ ᐱᐠᓯᔭᐦᑭᐣ ᐅᑯᒪᐏᓇᐣ ᓇᐣᑕ ᑯᑕᑭᔭᐠ ᐊᐏᔭᐠ, ᑲᔦ ᑫᐏᒋ ᒥᓄᓭᑭᐣ ᒪᒥᓄᓂᑫᐏᓇᐣ ᐃᑵᓂᐘᐣ ᐅᒋ ᑲᑭᓇ ᐊᓂᒥᓭᐏᓇᐣ ᐊᐍ ᐅᒋ ᐊᐏᔭ ᐁᑿ ᒪᒪᐅ ᒥᓂᑯᓱᐏᓇᐣ᙮ ᐅᐍ ᑐᑲᐣ ᐅᓀᐣᒋᑫᐏᐣ ᑕᑭ ᐅᒋ ᒪᒥᑐᓀᐣᒋᑲᑌᐘᐣ ᐃᔑᐱᒪᑎᓱᐏᓇᐣ, ᑲᔭᐡ ᑐᑕᒧᐏᓇᐣ, ᐘᐍᓇᐦᒋᑫᐏᓇᐣ ᐁᑿ ᐅᓇᑯᓂᑫᐏ ᐱᒧᒋᑫᐏᓇᐣ ᐃᑵᓂᐘᐠ ᐅᒋ ᐊᓂᔑᓂᓂᐘᐠ ᐁᑿ ᒥᓯᐍ ᐱᑯ ᐊᐦᑭᐠ ᐊᐏᔭᐠ ᐅᒥᓂᑯᓱᐏᓂᐘᐣ᙮

ᒪᓯᓇᐦᐃᑫᐏᐣ 41

ᑲᐏᒋ ᐊᓄᐦᑭᓭᑭᐣ ᐁᑿ ᐸᐸᑲᐣ ᐱᒧᒋᑫᐏᓇᐣ ᐃᒪ ᑲᒪᒪᐏᓂᑲᑌᑭᐣ ᐸᐸᑲᐣ ᐊᐦᑭᐣ ᐅᑯᒪᐏᓇᐣ ᐱᒧᒋᑫᐏᓂᐠ ᐁᑿ ᑯᑕᑭᔭᐣ ᐱᒋ ᐅᑯᒪᐏᓂᐠ ᐱᒧᒋᑫᐏᓇᐣ ᑕᑭᐏᒋᐦᐃᐍᓭ ᒥᑐᓂ ᒋᓂᐦᐢᑕᐏᓂᑲᑌᐠ ᐃᑵᓂᐘᐣ ᐘᐍᓇᐦᒋᑫᐏᓇᐣ ᐃᒪ ᑭᒋ ᐃᑭᑐᐏᐣ ᐃᒪ ᐅᒋ ᐊᔭᑕᒋᑫᐏᓂᐠ, ᑲᐃᔑᓭᐠ ᐱᑯ ᐊᐦᑯ, ᓇᐣᑕ ᔓᓂᔭᐏᓇᐠ ᐏᒋᐦᐃᑐᐏᓂᐠ ᐁᑿ ᑲᐃᔑᐱᒥᓭᑭᐣ ᐏᒋᐦᐃᑐᐏᓇᐣ᙮ ᑫᐏᒋ ᐃᓯᓭᐠ ᐁᑿ ᑐᒋᑫᐏᓇᐣ ᑫᐏᒋ ᑫᒋᓇᓭᐠ ᒋᐏᒋᑢᐘᐨ ᐊᓂᔑᓂᓂᐘᐠ ᐃᒪ ᐃᓯᓭᐏᓇᐣ ᑲᐏᒋᐸᑲᒥᐡᑲᑯᐘᒋᐣ ᑕᑭᐘᐍᓇᐦᒋᑲᑌᐘᐣ᙮

ᒪᓯᓇᐦᐃᑫᐏᐣ 42

ᑲᒪᒪᐏᓂᑲᑌᑭᐣ ᐸᐸᑲᐣ ᐊᐦᑭᐣ ᐅᑯᒪᐏᓇᐣ, ᐃᒪ ᑲᔦ ᑲᑭᑫ ᐅᓇᐦᒋᑫᐏᓂᐠ ᐃᐍ ᐅᒋ ᐊᓂᔑᓂᓂᐏ ᐃᓯᓭᐏᓇᐣ, ᐁᑿ ᑲᐃᔑᐸᐸᑲᓂᓇᑿᑭᐣ ᐱᒧᒋᑫᐏᓇᐣ, ᑲᔦ ᐃᒪ ᒥᓯᐍ ᐊᐦᑭᐠ ᐃᓀᑫ ᑲᔭᐱᒋᓭᐠ, ᐁᑿ ᐸᐱᐠᓯᔭᐦᑭᐠ ᐅᑲᓇᑯᑐᓇᐘᐣ ᑲᓇᑌᐣᑕᒧᐏᓂᓂ ᐃᑵᓂᐘᐣ ᐅᒋ ᐁᑿ ᑲᐃᔑ ᒥᓯᐍ ᐸᑭᑎᓂᑲᑌᓂᑭᐣ ᑿᔭᑎᓂᑫᐏᓇᐣ ᐃᒪ ᑭᒋ ᐃᑭᑐᐏᐣ ᐁᑿ ᒋᐱᒥᑲᓇᐘᐸᒋᑲᑌᐠ ᑲᐃᔑ ᐊᓄᐦᑭᓭᑵᐣ ᐃᐍ ᑭᒋ ᐃᑭᑐᐏᐣ᙮

ᒪᓯᓇᐦᐃᑫᐏᐣ 43

ᒥᓂᑯᓱᐏᓇᐣ ᑲᓂᐦᐢᑕᐏᓂᑲᑌᑭᐣ ᐅᒪ ᐅᒋᐘᐍᓂᓭᐘᐣ ᒪᐘᐨ ᐸᑭ ᑲᐃᔑ ᓇᑕᐍᐣᑕᑿᐠ ᑫᐏᒋ ᐱᒪᒋᐦᐅᓇᓂᐘᐠ, ᑲᓇᑌᓂᒥᑎᓯᓇᓂᐘᐠ ᐁᑿ ᑫᐏᒋ ᒥᓄᔭᓂᐘᐠ ᐃᑵᓂᐘᐠ ᐅᒋ ᐊᓂᔑᓂᓂᐘᐠ ᒥᓯᐍ ᐱᑯ ᐊᐦᑭᐠ᙮

ᒪᓯᓇᐦᐃᑫᐏᐣ 44

ᑲᑭᓇ ᒥᓂᑯᓱᐏᓇᐣ ᐁᑿ ᐸᐣᐢᑵᓱᐏᓇᐣ ᑲᓂᐦᐢᑕᐏᓂᑲᑌᑭᐣ ᐅᒪ ᑫᒋᓇᒋᑲᑌᐘᐣ ᑕᐱᑕᐅ ᑐᒋᑫᐏᓇᐣ ᐃᑵᓂᐘᐠ ᓇᐯᐘᐠ ᐁᑿ ᐃᑵᐘᐠ ᑲᔭᓂᔑᓂᓂᐏᐘᐨ᙮

ᒪᓯᓇᐦᐃᑫᐏᐣ 45

ᑲᐏᐣ ᑫᑯᐣ ᐅᒪ ᑭᒋ ᐃᑭᑐᐏᐣ ᑕᑭᐏᒋ ᐃᓀᐣᒋᑲᑌᓯᓄᐣ ᐁᐏᒋ ᐊᒍᓂᑲᑌᓂᑭᐣ ᓇᐣᑕ ᐁᓂᑲᑌᓂᑲᑌᓂᑭᐣ ᐅᒥᓂᑯᓱᐏᓂᐘᐣ ᐊᓂᔑᓂᓂᐘᐠ ᒣᑿᐨ ᑲᐊᔭᐘᒋᐣ ᓇᐣᑕ ᑫᔭᓂ ᑌᐱᓇᒧᐘᒋᐣ ᓂᑲᓂᐠ᙮

ᒪᓯᓇᐦᐃᑫᐏᐣ 46

1. ᑲᐏᐣ ᑫᑯᐣ ᐅᒪ ᑭᒋ ᐃᑭᑐᐏᐣ ᑕᑭᐏᒋ ᐃᓂᐍ ᐁᐃᑭᑐᒪᑲᐠ ᐊᐣ ᐃᐍ ᐱᑯ ᐱᐠᓯᔭᐦᑭ ᐅᑯᒪᐏᐣ, ᐊᐏᔭᐠ, ᐱᒧᒋᑫᐏᓇᐣ ᓇᐣᑕ ᐊᐏᔭ ᐊᐣ ᐃᐍ ᐱᑯ ᒥᓂᑯᓱᐏᐣ ᒋᔭᐸᑕᐠ ᐊᓂᑯ ᑐᑕᒧᐏᓂᐠ ᓇᐣᑕ ᑫᑯᐣ ᒋᑐᒋᑲᑌᐠ ᐸᑲᐣ ᐃᐍ ᑲᐃᔑᐱᐦᐃᑲᑌᐠ ᐃᒪ ᑲᒪᒪᐏᓂᑲᑌᑭᐣ ᐸᐸᑲᐣ ᐊᐦᑭᐣ ᐅᑯᒪᐏᓇᐣ ᓇᐣᑕ ᒋᐃᓀᐣᒋᑲᑌᐠ ᐁᐸᒋᑎᓂᑲᑌᐠ ᓇᐣᑕ ᐁᔕᔑᑭᒥᐍᓇᓂᐘᐠ ᑫᑯᐣ ᒋᑐᒋᑲᑌᐠ ᑫᐏᒋ ᐸᑵᓂᑲᑌᐠ ᓇᐣᑕ ᑫᐏᒋᒪᒋᓭᐠ, ᒥᓯᐍ ᐱᑯ ᓇᐣᑕ ᐸᑭ, ᐃᐍ ᐱᐠᓯᔭᐦᑭᐠ ᑕᔑᑫᐏᓂᐠ ᑿᔭᑯᓂᑫᐏᓂᐠ ᓇᐣᑕ ᐅᑯᒪᐏᓇᐠ ᑲᐃᔑ ᒪᒪᐅ ᐅᑯᒪᐏᓇᑕᓯᓇᓂᐘᐠ ᐁᑿ ᑲᐃᔑ ᐸᐯᔑᑯᑲᐸᐏᒪᑲᑭᐣ ᐸᐸᑲᐣ ᐱᐠᓯᔭᐦᑭ ᐅᑯᒪᐏᓇᐣ᙮

2. ᑲᔭᐸᒋᒋᑲᑌᑭᐣ ᒥᓂᑯᓱᐏᓇᐣ ᑲᐏᒋᑲᑌᑭᐣ ᐃᒪ ᓄᑯᒼ ᑲᑕᑿᐠ ᑭᒋ ᐃᑭᑐᐏᐣ, ᐊᐏᔭᐠ ᐅᒥᓂᑯᓱᐏᓂᐘᐣ ᐁᑿ ᑲᑭᓇ ᐸᐣᐢᑵᓭᐏᓇᐣ ᑕᑲᓇᑌᐣᑕᑿᓄᐣ᙮ ᑲᔭᐸᒋᒋᑲᑌᑭᐣ ᒥᓂᑯᓱᐏᓇᐣ ᑲᐏᒋᑲᑌᑭᐣ ᐃᒪ ᓄᑯᒼ ᑲᑕᑿᐠ ᑭᒋ ᐃᑭᑐᐏᐣ ᑕᑭ ᐊᐸᑕᐣ ᑲᐃᔑ ᐸᑭᑎᓂᑲᓂᐘᐠ ᒋᔭᐦᑯᓭᑭᐣ ᑲᑭᔑ ᐘᐍᓇᐦᑌᑭᐣ ᐃᒪ ᐅᓇᑯᓂᑫᐏᓂᐠ ᐁᑿ ᑲᐃᔑᓇᐱᓭᐠ ᐃᒪ ᒥᓯᐍ ᐱᑯ ᐊᐦᑭᐠ ᐊᐏᔭᐠ ᐅᒥᓂᑯᓱᐏᓂᐘᐣ ᑐᑕᒧᐏᓇᐣ᙮ ᐊᓂᑯ ᒥᓂᑯᐠ ᐸᑭᑎᓂᑫᓇᓂᐘᓂᑵᐣ ᑲᐏᐣ ᑕᑕᑿᐣ ᒪᒋᑐᑕᑫᐏᐣ ᐁᑿ ᑕᑭ ᐃᓯᓭ ᑫᒋᓇᐨ ᐃᐍ ᐁᐦᑕ ᒋᓇᐸᑕᐠ ᑫᐏᒋ ᑌᐱᓂᑲᑌᐠ ᓂᐦᐢᑕᐏᓇᒋᑫᐏᐣ ᐁᑿ ᑲᓇᑌᐣᑕᒧᐏᓇᐣ ᐃᑵᓂᐘᐣ ᐅᒋ ᐅᒥᓂᑯᓱᐏᓂᐘᐣ ᐁᑿ ᐅᐸᐣᐢᑵᓱᐏᓂᐘᐣ ᐊᐏᔭᐠ ᐁᑿ ᒋᑌᐱᓂᑲᑌᑭᐣ ᑌᐻᐏᓇᐠ ᐁᑿ ᒪᐘᐨ ᑲᐃᔑᑭᒋ ᓇᑕᐍᐣᑕᑿᐠ ᐊᐏᔭᐠ ᑲᐃᔑᒪᒪᐏ ᐏᒋᑢᐘᐨ ᐅᑯᒪᐏᓇᐠ ᐃᒪ ᐱᒪᑎᓱᐏᓂᐠ᙮

3. ᑲᑭᐘᐍᓇᐦᒋᑲᑌᑭᐣ ᐅᒪ ᑭᒋ ᐃᑭᑐᐏᓂᐠ ᑕᑭᐃᓂᐍᒋᑲᑌ ᑲᐃᔑᐏᓇᐦᑌᑭᐣ ᐃᒪ ᑲᐃᔑᐱᒥᐣᔕᐦᐃᑲᑌᑭᐣ ᑌᐻᐏᓇᐠ ᐅᓇᑯᓂᑫᐏᓂᐠ, ᑲᑭᓇ ᐊᐏᔭᐠ ᐅᑯᒪᐏᓇᐠ ᑲᐏᒋᑢᐘᐨ, ᑲᑲᓇᑌᐣᒋᑲᑌᑭᐣ ᐊᐏᔭᐠ ᐅᒥᓂᑯᓱᐏᓂᐘᐣ, ᑲᐏᐣ ᒪᒉᐣᒋᑫᐏᐣ ᐁᑿ ᒥᓄᑌᐻᔦᐣᑕᒧᐏᓂᐠ᙮